Գերմանիայից արտաքսված և Ադրբեջանում ձերբակալված քաղակտիվիստների հարազատները բողոքի ցույց են անցկացրել Բաքվում Գերմանիայի դեսպանատան մոտ

Բաքվում Գերմանիայի դեսպանատան դիմաց մի խումբ ադրբեջանցիներ բողոքի ակցիա են անցակացրել։ Տեղական լրատվականների հաղորդմամբ՝ ակցիան անցկացրել են Գերմանիայից արտաքսված և Ադրբեջանում ձերբակալված ակտիվիստների հարազատները։ Նրանք Գերմանիայի կառավարությանը կոչ են արել անտարբեր չմնալ այն մարդկանց ճակատագրերի հանդեպ, որոնց այդ երկիրը վտարել է՝ չնայած ձերբակալության սպառնալիքին։

Ակցիային մասնակցել են «Ժողովրդական ճակատ» կուսակցության ակտիվիստ Փյունհան Քերիմլիի և քաղաքական ակտիվիստ Սամիր Աշուրովի ընտանիքի անդամները, դատապարտված լրագրող Փոլադ Ասլանովի կինը՝ Գյուլմիրա Ասլանովան, նախկին քաղբանտարլյալ Աֆղան Սադիգովի կինը՝ Սևինջ Սադիկովան։

Նրանք իրենց ձեռքերում պահել են 6 անձանց դիմանկարները, որոնք ձերբակալվել են Ադրբեջանի իշխանությունների կողմից Գերմանիայից արտաքսվելուց հեռու, ինչպես նաև նրանց ազատ արձակման կոչերով պաստառներ։ Ակցիայի մասնակիցները պահանջել են հանդիպում դեսպանատան ներկայացուցիչների հետ, սակայն ոստիկանները նրանց մի կողմ են հրել՝ խլելով պաստառները։

«Իմ տղային ձերբակալել են փողոցում, երբ նա դուրս էր գալիս հարկային ծառայությունից։ Սկզբում ոստիկանությունն ասում էր, որ որդիս ձերբակալվել է ապօրինի զենք կրելու կասկածանքով։ Հետո զենքը փոխարինվեց թմրանյութերով։ Չնայած նրան, որ զրպարտչական մեղադրանքով են ձերբակալել, դատավարությունն էլ ընթանում է փաստացի փակ ռեժիմով»,- լրագրողներին ասել է Փյունհան Քերիմլիի հայրը։

Մեկ այլ ձերբակալված Սամիր Աշուրովի կինը՝ Նուրանա Աշուրովան, նույնպես դժգոհել է, որ դեսպանատունը չի քննարկում իր դիմումները։

«Ես բազմիցս նրանց գրել եմ, որ ընդունեն, սակայն արձագանք չկա։ Երբ մեզ Գերմանիայից արտաքսում էին, վստահեցնում էին, որ չեն հետապնդի, սակայն անմիջապես ձերբակալեցին»,- ասել է նա։

Հավելենք, որ անցյալ տարվա հոկտեմբերից Ադրբեջանում քրեական  տարբեր մեղադրանքներով ձերբակալվել են Գերմանիայից արտաքսված հինգ ակտիվիստներ՝ Մութալիմ Օրուջևը, Մալիկ Ռզաևը, Փյունհան Քերիմլին, Ջաֆար Միրզոևը և Սամիր Աշուրովը։ Եվս մեկ ակտիվիստի՝ Զիյա Իբրահիմլիին ձերբակալել են մայիսի 19-ին Գերմանիայից ժամանելուն պես, և վարչական օրենսդրության համաձայն՝ կալանավորել 30 օրով։

Էմմա Չոբանյան