Թուրքիան չի նահանջի իր դիրքերից ՆԱՏՕ-ին Շվեդիայի և Ֆինլանդիայի անդամակցության հարցում․ գրավոր երաշխիքներ են պետք․ Չավուշօղլու

Թուրքիան ակնկալում է, որ Շվեդիան և Ֆինլանդիան կդադարեցնեն ցանկացած շփում «ահաբեկչական կազմակերպությունների» հետ։ Եվ դա վերաբերվում է ոչ միայն PKK-ին և նրա սիրիական ճյուղին՝ YPG-ին, այլ նաև հանցավոր այլ կազմակերպություններին, այդ թվում՝ Ֆեթուլլահ Գյուլենի կողմնակիցներին։ Այս մասին հայտարարել է Թուրքիայի ԱԳ նախարար Մևլութ Չավուշօղլուն «Անադոլու» գործակալության խմբագիրների հետ կլոր սեղանի ընթացքում։

«Թուրքիան չի նահանջի իր դիրքերից՝ անկախ Սկանդինավյան երկրների կառավարությունների դիրքորոշումից։ Մեզ պետք են հստակ գրավոր երաշխիքներ»,- ասել է Չավուշօղլուն։

Նա նաև նշել է, որ անընդունելի են Թուրքիայի նկատմամբ պատժամիջոցները, որոնք սահմանել է հատկապես Շվեդիան։

«Սկանդինավիայում հայտարարում են ազգային օրենսդրության վերանայման անհրաժեշտության մասին։ Մենք պատրաստ ենք սպասել այնքան, որքան կպահանջվի, մինչև բավարարվեն Թուրքիայի ազգային անվտանգության պահանջները»,- ասել է Չավուշօղլուն։

Խոսելով Սիրիայում նոր ռազմական հարձակման հնարավորության մասին՝ նա նշել է, որ չնայած ԱՄՆ-ի և ՌԴ-ի հետ 2019 թվականի պայմանավորվածություններին՝ «ահաբեկիչները» թուրքական սահմանից Սիրիայի խորք դուրս չեն տարվել։

«Թուրքիայի սահմանի մոտ խնդիրները պահպանվում են։ Անկարան ունի բոլոր իրավունքները վերացնելու ահաբեկչության սպառնալիքը՝ համաձայն ՄԱԿ-ի կանոնադրության 51-րդ հոդվածի»,- ասել է Թուրքիայի ԱԳ նախարարը։

Նրա խոսքով՝ մի շարք երկրներում, այդ թվում՝ ԱՄՆ-ում, հնչում են կոչեր՝ հրաժարվելու Սիրիայում Թուրքիայի ԶՈՒ-ի նոր հարձակումից։

«Կոչերի փոխարեն ամերիկացիները պետք է կատարեն իրենց պարտավորությունները և մաքրեն Թուրքիայի սահմանամերձ տարածքները YPG/PKK-ի զինյալներից։ Անկախ նրանից, թե որտեղից է ահաբեկչության սպառնալիքը, դրա վերացումը Թուրքիայի առաջնահերթ խնդիրն է, այդ թվում՝ Սիրիայում»,- ասել է թուրք նախարարը։

Բացի այդ, Չավուշօղլուն նաև նշել է, որ հետախուզության տվյալներով՝ Սիրիայում Ռուսաստանի ռազմական ներկայության որևէ նվազում չկա։

Էմմա Չոբանյան