Ռուսաստանի հետ Հարավային Օսիայի միավորման հանրաքվեն հետաձգվել է

Հուլիսի 17-ին նախատեսված Հարավային Օսիայի չճանաչված հանրապետությունը Ռուսաստանի Դաշնությանը միավորելու վերաբերյալ հանրաքվեն հետաձգվել է՝ «հաշվի առնելով հանրաքվեի ներկայացված հարցի իրավական հետևանքների անորոշությունը»։ Այս մասին ասված է Հարավային Օսիայի նախագահ Ալան Գագլոևի հրամանագրում, փոխանցում է DW-ի ռուսական ծառայությունը։

Մայիսի 24-ին երդմնակալությունից հետո պաշտոնը ստանձնած Գագլոևն իր հրամանագրով չեղյալ է համարել նախորդ նախագահ Անատոլի Բիբիլովի՝ մայիսի 13-ի հրամանագիրը, որով նախատեսվում էր հանրաքվե անցկացնել։ Գագլոևի հրամանագրում ասվում է նաև, որ անհրաժեշտ է անհապաղ խորհրդակցություններ անցկացնել ռուսական կողմի հետ Հարավային Օսիայի և Ռուսաստանի Դաշնության ինտեգրման հետ կապված հարցերի ողջ շրջանակի շուրջ։

Ավելի վաղ՝ մայիսի 24-ին, ՌԴ նախագահի խոսնակ Դմիտրի Պեսկովը հայտարարել էր, որ Մոսկվան ոչ մի քայլ չի ձեռնարկում Հարավային Օսիայում հանրաքվե կազմակերպելու համար։ Հանրաքվեի անցկացման նախաձեռնությունը պետք է վերջնական տեսքի բերվի օրինական ճանապարհով, այդ թվում՝ «մտածելով ձեւակերպումների մասին», շեշտել էր Պեսկովը։

Հիշեցնենք, որ 2008 թվականի օգոստոսի 26-ին՝ Վրաստանում «հնգօրյա պատերազմից» անմիջապես հետո, Ռուսաստանի այն ժամանակվա նախագահ Դմիտրի Մեդվեդևը հրամանագիր էր ստորագրել Ռուսաստանի Դաշնության կողմից Հարավային Օսիայի և Աբխազիայի անկախությունը ճանաչելու մասին։ Այդ ժամանակից ի վեր Հարավային Օսիայի ղեկավարությունը բազմիցս հայտարարել է Ռուսաստանին միանալու վերաբերյալ հանրաքվե անցկացնելու ծրագրերի մասին։ Բացի Ռուսաստանից՝ Հարավային Օսիայի անկախությունը Վրաստանից ճանաչել են աշխարհի մի քանի երկրներ։

Տաթև Ֆռանգյան