Գյումրիում «Ամերիկյան թաղամաս» է կառուցվելու․ ներդրողը տարածքի հատկացման դիմում է ներկայացրել

Գյումրիի ծայրամասային Անի և Ավստրիական թաղամասերի մեջտեղում նոր թաղամաս կկառուցվի՝ ամերիկյան արվարձանային բնակավայրերի նմանությամբ։

Այն լինելու է էկոթաղամաս, նախատեսված է կառուցել կանադական կարկասային տեխնոլոգիայով, որով աշխարհում կառուցվում է առանձնատների մեծամասնություն։ Տները կառուցվելու են SIP վահանակներով (structural insulated panel – կառուցվածքային իզոլացված վահանակ), ինչն ապահովում է ամրություն, էներգախնայողություն, արագ կառուցապատում։ Այս մասին տեղեկանում ենք http://gyumri.info/կայէջից, որտեղ նաև մանրամասն տեղեկություններ կան օգտագործվող շինանյութի, կոնստրուկցիայի, սեյսմակայունության, անգամ գների մասին։ Կայքում նաև կառուցվելիք տների լուսանկարներն են հրապարակված։

Նշվում է, որ կառուցվելու են երեք տիպի տներ, իսկ կառուցապատումն իրականացնելու է «Վեսթ Հաուս» շինարարական ընկերությունը։

Գյումրու քաղաքապետարանի գլխավոր ճարտարապետ Հենրիկ Գասպարյանը Factor TV-ի հետ զրույցում պարզաբանեց, որ ծրագիրը դեռևս քննարկման փուլում է, ներդրողը դիմել է քաղաքապետարան՝ տարածք հատկացնելու համար, իրենք էլ առաջարկել են Անի թաղամասի հարևանությամբ գտնվող տարածքը։

Ըստ ճարտարապետի՝ տարածքը դեռ հատկացված չէ, նախագիծը հաստատված չէ, ըստ էության, միայն առաջարկ է եղել։

Հենրիկ Գասպարյանը հավելեց, որ առայժմ պարզ չէ նաև՝ նոր թաղամասում առանձնատնե՞ր, թե՞ բազմաբնակարան շենքեր են լինելու, քանի որ նախագիծ դեռ չի ներկայացվել։ Կառուցապատողի կողմից նախագիծը ներկայացնելուց ու հաստատվելուց հետո միայն նոր մանրամասներ կհրապարակվեն։

Արմիկ Մովսիսյան