Բիլ Գեյթսը ևս մեկ համաճարակ է կանխատեսում

50 տոկոս հավանականություն կա, որ մարդկությունը մոտակա 20 տարում կբախվի նոր համաճարակի։ Այս մասին իսպանական El Diario-ին տված հարցազրույցում ասել է ամերիկացի միլիարդատեր, բարերար Բիլ Գեյթսը, գրում է Korrespondent-ը։

«Դա կարող է լինել մարդու կողմից ստեղծված վիրուս, բիոահաբեկչություն, որը զարգացնում է այն և միտումնավոր տարածում, կամ կարող է լինել մի բան, որը դուրս է գալիս բնական աշխարհից: Մարդկային պոպուլյացիան աճում է, և մենք ավելի ու ավելի շատ էկոհամակարգեր ենք ներխուժում: Հետևաբար, ես գնահատում եմ, որ 50 տոկոս հավանականություն կա, որ առաջիկա 20 տարում կլիմայի փոփոխության հետևանքով մենք կբախվենք բնական համաճարակի»,- ասել է նա։

Գեյթսը կարծում է, որ նման սցենարը կանխելու համար մարդկությունը պետք է դասեր քաղի կորոնավիրուսային համաճարակից. անհրաժեշտ է 25 տոկոսով ավելացնել Առողջապահության համաշխարհային կազմակերպության ֆինանսավորումը և ստեղծել համաճարակային արձագանքման միջազգային թիմ։

«Ես ամենից հաճախ համեմատականներ եմ տանում հրշեջների հետ. հրդեհները կանխելու համար պետք է անընդհատ հրշեջների պահել: Նրանք սովորում են, պատրաստվում են, մենք դրան լուրջ ենք վերաբերվում: Ցավոք, համաճարակները պետք է լինեն այն բաների շարքում, որոնց կառավարությունները պետք է պատրաստ լինեն, եթե նրանք ձգտում են պաշտպանել իրենց քաղաքացիներին»,- հավելել է միլիարդատերը։

Պատասխանելով կապիկի ծաղիկի մասին հարցին՝ Գեյթսը կարծիք է հայտնել, որ այն համաճարակ չի առաջացնի։

«Եթե չլիներ կորոնավիրուսային համաճարակը, կապիկի ծաղիկ հիվանդությունը նույնիսկ նորությունների մեջ չէր լինի»,- ասել է նա:

Տաթև Ֆռանգյան