Կրեմլի պատերի տակ այնքան սողացինք, որ աշխարհը մեզնից երես թեքեց. Եղիշե Պետրոսյան. ՏԵՍԱՆՅՈՒԹ

«Մենք, ցավոք, մսխել ենք բոլոր այն դրական հիմքերը, որոնց շնորհիվ քարը քարի վրա դնելով պետք է զարգացնեինք մեր պետությունը: «Անկախություն» բառը մեզ մոտ դատարկ խոսքի մակարդակով է ընկալվում: Մենք կտոր-կտոր արեցինք Արցախը, Հայաստանը կանգնեցրինք լուրջ վտանգի առջև. դա էլ չի գիտակցվում, իսկ ամենավատն այն է, որ այսօր ունենք բզկտված հասարակություն»,- Factor TV-ի հետ զրույցում իր մտահոգությունն է հայտնում երաժիշտ, երգահան Եղիշե Պետրոսյանը:

Անդրադառնալով հայաստանյան ներքաղաքական կյանքին` մեր զրուցակիցը տեսակետ է հայտնում, որ 2018-ին մսխվեց ողջ հեղափոխական, կառուցողական էներգիան, բաց թողնվեց կոնսոլիդացիայի, հրեղենության պահը.

«Կրեմլի պատերի տակ այնքան սողացինք, որ աշխարհը մեզնից երես թեքեց: Այսօր էլ Հայաստանում կա հեղափոխական էներգիա, բայց այն բավարար չէ: Ընդդիմությունը հերթական իշխանափոխությունն է ուզում, իսկ ժողովուրդն իշխանափոխության համար փողոց դուրս չի գա: Ապացուցվել է, որ ընդամենը իշխանափոխությունը ոչինչ չի փոխում երկրում. երկրին համակարգային փոփոխություն է անհրաժեշտ: Կարմիր գծին արդեն շատ մոտեցել ենք: Իշխանափոխություն պետք է, բայց ոչ այս հինգերորդ շարասյան դեմքով. մեզ հերթական կրեմլահպատակ իշխանություն պետք չէ»:

Եղիշե Պետրոսյանի կարծիքով` փողոցում գտնվող ընդդիմությունն օգնում է, որ այս իշխանությունը մնա, քանի որ այդ ընդդիմության դեմքով ժողովուրդը չի ուզում փոփոխություն տեսնել.

«Նախկիններն էլ, ներկաներն էլ ցույց են տվել իրենց սնանկությունն ու ապաշնորհությունը. մեզ պետականաստեղծ ուժեր են պետք»:

Մանրամասները` տեսանյութում:

Աննա Բաբաջանյան