13.09.2026 | 21:40
Ցեմենտի շուկայում պակասուրդը պայմանավորված է հարևան երկրներից եկող մատակարարումների խաթարումներով․ Գևորգ Պապոյան
Թուրքիայի Մշակույթի նախարարությունը չեղարկել է հայտնի հայ ջութակահար Արա Մալիքյանի համերգը
Մշակույթ
27.05.2022 | 19:47
Թուրքիայի Մշակույթի նախարարությունը չեղարկել է «Մայրաքաղաքային մշակութային ճանապարհ» փառատոնի ծրագրի շրջանակում հայ աշխահահռչակ ջութակահար Արա Մալիքյանի ելույթը՝ չնշելով որոշման պատճառը, գրում է Bianet-ը։
Նշվում է, որ համերգը պետք է տեղի ունենար հունիսի 1-ին նախագահական սիմֆոնիկ նվագախմբի համերգային դահլիճում։ Տոմսեր գնածներին հաղորդագրությամբ են տեղեկացրել ելույթի չեղարկման մասին։
Մշակույթի և զբոսաշրջության նախարարության նախաձեռնությամբ Անկարայում և Ստամբուլում անցկացվում է «Մշակութային ճանապարհ փառատոնը»։ Այն մեկնարկելու է վաղը և տևելու է 16 օր, փառատոնի շրջանակում տեղի է ունենալու մոտ 2000 միջոցառում։
Նախարարության պաշտոնական կայքի հաղորդագրությունում ի սկզբանե հրապարակված է եղել նաև Արա Մալիքյանի համերգի մասին տեղեկությունը։ Սակայն 2022 թվականի մայիսի 27-ից նախարարության կայքերում Արա Մալիքյանի համերգի մասին տեղեկություն չկա։
Արա Մալիքյանին «թուրքերի թշնամի» որակելով՝ Twitter-ի որոշ օգտատերեր կոչ են արել Մշակույթի նախարարությանը չեղարկել համերգը։
Նշենք, որ աշխահահռչակ հայ ջութակահարը 2012 և 2019 թվականներին ելույթ ունեցել է Ստամբուլում և Իզմիրում։
Արա Մալիքյան ծնվել է Բեյրութում, այժմ բնակվում և գործունեություն է ծավալում Մադրիդում։
Էմմա Չոբանյան
