20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Կապիկի ծաղիկ․ նոր դեպքեր ԱՄԷ-ում
Քաղաքականություն
26.05.2022 | 21:15
Արաբական Միացյալ Էմիրությունները դարձել է Պարսից ծոցի առաջին երկիրը, որը հայտնել է կապիկի ծաղիկի դեպքի մասին։ Մինչդեռ հիվանդությունն ավելի լայն տարածում է գտնում Եվրոպայում։ Չորեքշաբթի կապիկի ծաղիկ է հայտնաբերվել Չեխիայում և Սլովենիայում, Մեծ Բրիտանիայում արդեն 78 դեպք ka, Պորտուգալիայում՝ շուրջ 50, հայտնում է Euronews-ը։
Ֆրանսիայի առողջապահության նախարար Բրիժիտ Բուրգինյոնն այցելել է Լուի Պաստերի ինստիտուտ, որտեղ իրավիճակը քննարկել է Արտակարգ իրավիճակների կենսաբանական հետազոտությունների դեպարտամենտի գիտնականների հետ։
«Պետք է հասկանալ, որ այս հիվանդությունը շատ դեպքերում անցնում է թեթև ձևով, վարակվածներn ինքնամեկուսացվում են տանը: Ես խոսում եմ ոչ միայն որպես առողջապահության, այլև կանխարգելման նախարար. խորհուրդ է տրվում մեկուսանալ, որպեսզի չտարածվի հիվանդությունը, որն անհետանում է երկու-երեք շաբաթից»,- ասել է Բուրգինյոնը:
Հիվանդության ինկուբացիոն շրջանը տևում է մեկից երեք շաբաթ: Ախտանիշներն են՝ ջերմություն, գլխացավ, մկանային ցավ, հոգնածություն և ցան, որը կարող է տարածվել ամբողջ մարմնով։ Որոշ գիտնականների կարծիքով՝ ջրծաղիկի դեմ պատվաստումը կարող է արդյունավետ պաշտպանություն լինել նաև կապիկի ծաղիկի դեմ:
Տաթև Ֆռանգյան
