18.05.2026 | 23:42
«Անկախ դիտորդ»-ը պահանջում է ազատ արձակել Արթուր Օսիպյանին և պարզաբանում տալ նրա ձերբակալության հիմքերի վերաբերյալ
Չավուշօղլուն հայտարարել է, որ Թուրքիան ստիպված կլինի Սիրիայում գործողություն իրականացնել, եթե սպառնալիքը մեծանա
Քաղաքականություն
26.05.2022 | 18:36
Թուրքիայի իշխանությունները ստիպված կլինեն նոր գործողություն իրականացնել Սիրիայում, եթե սահմանային գոտում սպառնացող վտանգը մեծանա։ Այս մասին հայտարարել է Թուրքիայի ԱԳ նախարար Մևլութ Չավուշօղլուն, գրում է ՏԱՍՍ-ը։
«Թուրքիայի համար սպառնալիքը սկսել է մեծանալ «Խաղաղության աղբյուր» օպերացիայի անցկացման գոտում և այլ ուղղություններում։ Մենք անցկացրել ենք այդ գործողությունները, որպեսզի վերացնենք վտանգը։ Սակայն եթե վտանգը նորից աճի, ապա մեր պարտքն է՝ միջոցներ ձեռնարկել դրա դեմ։ Ամերիկացիները, ինչպես մենք տեսնում ենք ՆԱՏՕ-ի գործընթացում, ասում են, որ հասկանում են մեր մտահոգությունները։ Մեր անհանգստությունն իրական է»,- ասել է Չավուշօղլուն։
Նա նշել է, որ ԱՄՆ-ը խոստացել է նվազեցնել ահաբեկչական կազմակերպությունների ներկայությունը թուրքական սահմանից մինչև 30 կմ խորության վրա գտնվող տարածքներում, սակայն «խոստումը չի կատարվել»։
«Նույնը վերաբերվում է նաև Ռուսաստանին։ Մենք նրանց հետ ևս պայմանավորվել էինք։ Երկու երկրները պատասխանատվություն են կրում ներկա փուլում։ Ի վերջո, դա տեղի չի ունեցել, և ահաբեկչությունները վերջին շրջանում ավելացել են։ Մենք չենք կարող մնալ կապված ձեռքերով»,- ասել է թուրք պաշտոնյան։
Հիշեցնենք, որ այս շաբաթ ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր, որ նոր ռազմական հարձակում կարող է մեկնարկել Սիրիայի հյուսիսում։
Էմմա Չոբանյան
