27.02.2026 | 23:31
Ստեփանծմինդա-Լարս ավտոճանապարհը փակ է
Մոլդովայի ռուսամետ նախկին նախագահին դավաճանության և կոռուպցիայի գործով մեղադրանք է ներկայացվել
Քաղաքականություն
26.05.2022 | 17:23
Մոլդովայի նախկին նախագահ Իգոր Դոդոնին, որը հայտնի է իր ռուսամետ դիրքորոշմամբ, կոռուպցիայի և դավաճանության գործով մեղադրանք է առաջադրվել։ Երկրի Գլխավոր դատախազությունը դիմել է դատարան՝ Դոդոնին 30 օրով կալանավորելու միջնորդությամբ։ Այս մասին այսօր հայտնել է Գլխավոր դատախազության մամուլի քարտուղար Մարիաննա Կերպեկը, գրում է DW-ի ռուսական ծառայությունը։
Նրա խոսքով՝ նախկին նախագահի դեմ քրեական գործ է հարուցվել չորս հոդվածներով․ բացի պասիվ կոռուպցիայից և պետական դավաճանությունից՝ խոսքը նաև ապօրինի հարստացման և հանցավոր կազմակերպությունից քաղաքական կուսակցության ֆինանսավորում ստանալու մասին է։
Մայիսի 24-ին խուզարկություններից հետո Իգոր Դոդոնին 72 ժամով կալանավորել են։ Նրան տեղափոխել են Քիշնևի քննչական մեկուսարանում։ Գլխավոր դատախազության տվյալներով՝ խուզարկություններ են կատարվել Դոդոնին և նրա մերձավոր շրջապատին պատկանող 12 շինություններում։ Դրանք անցկացվել են նաև Ռուս-մոլդովական գործարար միության գրասենյակում, որը Մոլդովայի նախկին նախագահը ստեղծել և ղեկավարել է փետրվարին։
«Մեդիազոնա»-ն հիշեցնում է, որ Ուկրաինայի դեմ ռուսական պատերազմի մեկնարկից հետո Դոդոնը քննադատել է Մոլդովայի՝ ԱՊՀ-ից դուրս գալու գաղափարը, առաջարկել է երկրից արտաքսել ուկրաինացի փախստականներին և կոչ է արել բարեկամանալ Վլադիմիր Պուտինի հետ։
Անցյալ շաբաթ Մոլդովայի գլխավոր դատախազի տեղակալ Դմիտրի Ռոբուն որոշում է ստորագրել մեծ հնչեղություն ստացած «փաթեթի գործով» քրեական գործ հարուցելու մասին։ Խոսքը Մոլդովայի Դեմոկրատական կուսակցության գրասենյակում 2019 թվականին արված տեսագրությունների մասին է։ Տեսանյութում օլիգարխ Վլադիմիր Պլախոտնյուկը, որը գլխավորել է կուսակցությունը, Դոդոնին հանձնում է փաթեթ (ծրար), որտեղ, ենթադրաբար, գումար է եղել։ Պլախոտնյուկի և Մոլդովայի նախկին նախագահի զրույցից պարզ է դառնում, որ այն գումարը, որը Դոդոնը վերցնում է օլիգարխից, նախատեսված է Մոլդովայի Սոցիալիստական կուսակցությանը ֆինանսավորելու համար, որը գլխավորում էր Դոդոնը։
Իգոր Դոդոնը Մոլդովայի նախագահի պաշտոնը զբաղեցրել է 2016 թվականի դեկտեմբերից մինչև 2020 թվականի դեկտեմբեր։ Նա սերտ համագործակցության քաղաքական կուրս է սկսել Ռուսաստանի հետ և իր նախագահության ընթացքում հաճախակի հանդիպել է ՌԴ նախագահ Վլադիմիր Պուտինի հետ։
Տաթև Ֆռանգյան
