Իսրայելը մերժել է ԱՄՆ-ի խնդրանքը՝ հավանություն տալ Ուկրաինային «Spike» հրթիռների փոխանցմանը

Իսրայելը մերժել է ԱՄՆ-ի խնդրանքը՝ թույլ տալ Բեռլինին Ուկրաինային մատակարարել իսրայելական տեխնոլոգիայով և իսրայելական արտոնագրով Գերմանիայում արտադրված հակատանկային հրթիռները։ Այս մասին ասել են ԱՄՆ-ի և Իսրայելի երկու պաշտոնյաներ, գրում է Axios-ը։

Լրատվամիջոցը նշում է, որ զենքի մատակարարման հարցը ԱՄՆ-ի և Իսրայելի միջև քաղաքականության վերջին տարբերություններից մեկն է, երբ խոսքը վերաբերում է պատերազմին: Ջո Բայդենի վարչակազմի ճնշման ներքո Իսրայելը շտկել է իր քաղաքականությունը Մոսկվայի նկատմամբ և աստիճանաբար ավելի ուկրաինամետ դիրք է գրավել, սակայն մինչ այժմ նա Ուկրաինային չի մատակարարել առաջադեմ սպառազինություն:

Իսրայելի Պաշտպանության նախարարության գլխավոր տնօրեն Ամիր Էշելը երկու շաբաթ առաջ այցելել է Վաշինգտոն՝ Պենտագոնի պաշտոնյաների հետ բանակցություններ վարելու ԱՄՆ-ի և Իսրայելի միջև անվտանգության ոլորտում համագործակցության շուրջ։

Ըստ լրատվամիջոցի աղբյուրների՝ ԱՄՆ պաշտպանության նախարարի քաղաքականության հարցերով տեղակալ Քոլին Քահլը հանդիպել է Էշելի հետ և բարձրաձայնել Բայդենի վարչակազմի ջանքերը՝ ստիպելու աշխարհի երկրներին զենք մատակարարել Ուկրաինային։ Քահլը հարցրել է Էշելին՝ արդյո՞ք Իսրայելը կթույլտարի Գերմանիային՝ Ուկրաինային «Spike» հակատանկային հրթիռներ փոխանցել։ Դրանք արտադրվում են  Գերմանիայում Իսրայելին պատկանող գործարանում։ Արտոնագրի համաձայն՝ Իսրայելը պետք է հավանություն տա հրթիռների ցանկացած փոխանցմանը երրորդ կողմին։

Էշելը մերժել է խնդրանքը՝ ասելով Քահլին, որ Իսրայելն Ուկրաինային միայն ոչ մահաբեր ռազմական տեխնիկա է մատակարարելու։ Իսրայելցի պաշտոնյան ասել է, որ Իսրայելը մտահոգված է, որ ռուս զինվորները կսպանվեն իսրայելական արտադրության զենքերից, ինչը կարող է հանգեցնել նրան, որ Ռուսաստանը վնասի Իսրայելի անվտանգության շահերին Սիրիայում: Ըստ նրա՝ Ռուսաստանն ահռելի ազդեցություն ունի Սիրիայում, սակայն թույլ է տալիս Իսրայելին ազատորեն գործել այնտեղ Իրանի գործունեության դեմ:

Էմմա Չոբանյան