14.12.2025 | 10:10
Ահազանգեր են ստացվել տապալված ծառերի, սյուների, ինչպես նաև պոկված կառուցատարրերի վերաբերյալ․ ՆԳՆ
Պայթյունավտանգ իրավիճակ է ստեղծվել՝ պատերազմ կարող է բռնկվել․ Արևմուտքը դա գիտի՝ կայունացնող պրոցես է տանում․ Ստյոպա Սաֆարյան. ՏԵՍԱՆՅՈՒԹ
Քաղաքականություն
25.05.2022 | 21:02
Իրականում որտե՞ղ է այս պահին որոշվում Ղարաբաղի ճակատագիրը, Բրյուսելո՞ւմ, թե՞ Մինսկի խմբում է հանգուցալուծումը տրվելու։ Բաքվի 5 կետերին ի պատասխան՝ ՀՀ-ն դիմել էր Մինսկի խմբին՝ միջնորդելու Ադրբեջանի հետ բանակցելիս։ Սակայն համանախագահ պետություններ ՌԴ-ն, Ֆրանսիան, ԱՄՆ-ն, ուկրաինական պատերազմով պայմանավորված, ապահարզան տվեցին, և դե ֆակտո չի գործում խումբը։ Արդյո՞ք ԵՄ-ի բրյուսելյան հարթակն է փոխարինում Մինսկի խմբին, թե՞ պետք է ակնկալել, որ Ղարաբաղի ճակատագիրը որոշվելու է Մինսկի խմբում։
Միջազգային և անվտանգության հարցերի հայկական ինստիտուտի հիմնադիր Ստյոպա Սաֆարյանը Factor TV-ի հարցազրույցում կարծիք է հայտնում, որ Բրյուսելում չէ, որ որոշվում է Ղարաբաղի ճակատագիրը, այլ բան է՝ Բրյուսելում, գուցե, խթանվի պրոցես, որը կտեղափոխվի Մինսկի խումբ։
«Ինչո՞ւ մենք ունենք Բրյուսել, և ոչ, օրինակ, Մինսկի խումբ․ պատերազմից հետո Մինսկի խմբի գործունեության վերսկսման խոչընդոտներ հարուցել էին Ադրբեջանը, որ պնդում էր՝ Մինսկի խումբն անելիք չունի, ինքը խնդիրը լուծել է, և Մոսկվան, որը գտնում էր, որ Մինսկի խմբի օրակարգում ԼՂ-ի կարգավիճակը պիտի տեղափոխվի ապագա։ Ուկրաինայի պատերազմը շատ ավելի ֆունդամենտալ ձևով սառեցրեց Մինսկի խմբին, և անհնարինություն է առաջացել խնդիրն այնտեղ քննարկելու»,- ասում է քաղաքագետ Ստյոպա Սաֆարյանը։
Ըստ նրա՝ Արևմուտքը հասկանում է, որ այս իրավիճակը երկար պահպանել հնարավոր չէ՝ վտանգավոր է, որովհետև տեղում շատ պայթյունավտանգ իրավիճակներ են առաջանում, որոնք կարող են վերաբռնկել պատերազմը, և պետք է պրոցես գնա։ Արևմուտքի այսօրվա միջնորդությունը, Ստյոպա Սաֆարյանի գնահատմամբ, կայունացնող ազդեցություն է ունենում տարածաշրջանում։
Հարցազրույցն ամբողջությամբ՝ տեսանյութում։
Ռոբերտ Անանյան
