Զելենսկին Դավոսում հայտարարել է պատերազմի ավարտի պայմանները

Ուկրաինայի նախագահ Վլադիմիր Զելենսկին Դավոսում ելույթ է ունեցել ուկրաինական նախաճաշի ժամանակ։ Նա քննադատել է Արևմուտքին միասնականության բացակայության համար, նախատել Հունգարիային՝ Ռուսաստանի դեմ պատժամիջոցների վեցերորդ փաթեթն արգելափակելու համար, ասել է, որ Պուտինը դեռ պատերազմ է վարում, քանի որ իր շրջապատն իրենից թաքցնում է իրական իրադրությունը, ինչպես նաև նշել է պատերազմը դադարեցնելու պայմանները, գրում է Korrespondent-ը։

«Ինչ վերաբերում է հարցին, թե ե՞րբ կարող է ավարտվել այս պատերազմը, կարծում եմ՝ դա կախված է որոշ բաներից, առաջին հերթին՝ տարբեր կողմերի ցանկությունից, ուժի և զենքի հարցում Արևմուտքի միասնականությունից, Ուկրաինայի ֆինանսական հզորությունից, միասնական Արևմուտքի՝ Ռուսաստանի Դաշնության հետ կռվելուց չվախենալուց, այս հիբրիդային պատերազմում այլ կերպ, ոչ թե սեփական մարդկանցով կռվելուց»,- ասել է Զելենսկին։

Պատերազմը դադարեցնելու դիվանագիտական ճանապարհը, ըստ Զելենսկու, հնարավոր է միայն ռուսական զորքերը ներխուժումից առաջ դիրքեր դուրս բերելուց հետո։ Միաժամանակ, Ուկրաինան հավակնում է վերադարձնել նախկինում օկուպացված տարածքները։

Զելենսկին, սակայն, ասել է, որ բանակցություններ վարելու ցանկություն Ռուսաստանի կողմից չկա:

«Մենք հասկանում ենք, որ կա պատերազմի ռազմական մաս, և դրանից հետո, ամեն դեպքում, կլինի խաղաղության գործընթաց, բանակցությունների սեղան և հաստատ խաղաղություն կլինի։ Հարցն այն է, թե ո՞ւմ հետ Ուկրաինան կպայմանավորվի, ՌԴ ո՞ր նախագահի հետ։ Դա ևս կախված է ՌԴ-ի գործող նախագահի ցանկությունից»,- ընդգծել է Վլադիմիր Զելենսկին։

Միաժամանակ, ըստ նրա, ՌԴ նախագահ Վլադիմիր Պուտինը տեղյակ չէ, թե ինչ է կատարվում։

«Նա ապրում է իր տեղեկատվական աշխարհում՝ չհասկանալով, որ Ուկրաինան զիջումների չի գնա։ Մենք պայքարում ենք մեր հողի վրա, և ոչ թե որևէ մեկի դեմ, այլ մեր և մեր ազատության, ապագայի համար։ Նա պետք է ապրի իրականությունում։ Այսօր կարելի է խոսել միայն Ռուսաստանի Դաշնության նախագահի հետ, միջնորդների հետ խոսելն իմաստ չունի»,- հավելել է Ուկրաինայի նախագահը։

Տաթև Ֆռանգյան