09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
ՀՀ-ի և Ադրբեջանի սահմանների սահմանազատման հանձնաժողովի երկրորդ նիստը կկայանա Մոսկվայում
Քաղաքականություն
25.05.2022 | 12:52
Հաջորդ շաբաթ Մոսկվայում կկայանա Հայաստանի և Ադրբեջանի սահմանների սահմանազատման հանձնաժողովի երկրորդ նիստը։ ՏԱՍՍ-ի փոխանցմամբ՝ այս մասին հայտնել է ՌԴ փոխարտգործնախարար Անդրեյ Ռուդենկոն:
«Հուսով ենք, որ այն տեղի կունենա հաջորդ շաբաթ»,- ասել է նա՝ պատասխանելով ՏԱՍՍ-ի հարցին։
Հիշեցնենք, որ Փաշինյան-Միշել-Ալիև բրյուսելյան բանակցություններից մեկ օր անց՝ Երևանն ու Բաքուն հրապարակեցին սահմանազատման և սահմանային անվտանգության հարցերով հանձնաժողովների կազմը։
Երկու երկրների հանձնաժողովներն էլ գլխավորում են փոխվարչապետերը՝ Մհեր Գրիգորյանն ու Շահին Մուստաֆաևը, ովքեր նաև տրանսպորտային ապաշրջափակման եռակողմ (Հայաստան-Ադրբեջան-Ռուսաստան) հանձնաժողովների համանախագահներն են։
Հավելենք, որ երեկ՝ մայիսի 24-ին Հայաստանի և Ադրբեջանի միջպետական սահմանին տեղի է ունեցել Հայաստանի Հանրապետության փոխվարչապետ Մհեր Գրիգորյանի և Ադրբեջանի Հանրապետության փոխվարչապետ Շահին Մուստաֆաևի առաջին հանդիպումը` Հայաստանի և Ադրբեջանի միջև սահմանազատման և սահմանային անվտանգության հարցերով հանձնաժողովների համատեղ աշխատանքի ձևաչափով։
ՀՀ ԱԳՆ տարածած հաղորդագրության համաձայն՝ միջպետական սահմանին հանդիպումների հետ մեկտեղ՝ կողմերը համաձայնության են եկել hանձնաժողովների հետագա հանդիպումների անցկացման համար տարբեր հարթակներ օգտագործելու նպատակահարմարության շուրջ։ Մասնավորապես՝ պայմանավորվածություն է ձեռք բերվել երկրորդ հանդիպումն անցկացնել Մոսկվայում, երրորդը՝ Բրյուսելում։
Տաթև Ֆռանգյան
