15.09.2026 | 19:21
Դատավոր Սամվել Թադևոսյանը կրկին հրաժարականի դիմում է ներկայացրել. ԲԴԽ-ն դադարեցրել է նրա լիազորությունները
Ձերբակալվել է Մոլդովայի նախկին նախագահ Իգոր Դոդոնը
Քաղաքականություն
24.05.2022 | 15:58
Մոլդովայի նախկին նախագահ Իգոր Դոդոնը 72 ժամով ձերբակալվել է՝ երկրի Քրեական օրենսգրքի 4 հոդվածներով հարուցված քրեական գործի շրջանակում, այդ թվում՝ պետական դավաճանության մեղադրանքով։ BBC-ի ռուսական ծառայության փոխանցմամբ՝ այս մասին լրագրողներին ասել է Մոլդովայի Գլխավոր դատախազության մամուլի քարտուղար Մարիաննա Կերպեկը։
Ավելի ուշ դատախազությունը պարզաբանել է, որ կալանքի որոշում դեռ չի եղել։
Այսօր առավոտյան հայտնի է դարձել, որ նախկին նախագահի տանը խուզարկություն է իրականացվում։ Գլխավոր դատախազությունից հայտնել են, որ խուզարկություններ են կատարվում «փաթեթի գործով»։ Խոսքը Մոլդովայի Դեմոկրատական կուսակցության գրասենյակում 2019 թվականին արված տեսագրությունների մասին է։ Տեսանյութում օլիգարխ Վլադիմիր Պլախոտնյուկը, որը գլխավորել է կուսակցությունը, Դոդոնին հանձնում է փաթեթ (ծրար), որտեղ, ենթադրաբար, գումար է եղել։
Պլախոտնյուկի և Մոլդովայի նախկին նախագահի զրույցից պարզ է դառնում, որ այն գումարը, որը Դոդոնը վերցնում է օլիգարխից, նախատեսված է Մոլդովայի Սոցիալիստական կուսակցությանը ֆինանսավորելու համար, որը գլխավորում էր Դոդոնը։
Իգոր Դոդոնը Մոլդովայի նախագահի պաշտոնը զբաղեցրել է 2016 թվականի դեկտեմբերից մինչև 2020 թվականի դեկտեմբեր։ Նա սերտ համագործակցության քաղաքական կուրս է սկսել Ռուսաստանի հետ և իր նախագահության ընթացքում հաճախակի հանդիպել է ՌԴ նախագահ Վլադիմիր Պուտինի հետ։
Տաթև Ֆռանգյան
