Ալեքսեյ Նավալնիին տեղափոխում են խիստ ռեժիմի գաղութ

Մոսկվայի քաղաքային դատարանը հրաժարվել է բավարարել ռուսաստանցի ընդդիմադիր գործիչ Ալեքսեյ Նավալնիի բողոքը, որը դատապարտվել է 9 տարվա ազատազրկման «խարդախության և դատարանի նկատմամբ անհարգալից վերաբերմունքի» հոդվածներով, գրում է DW-ի ռուսական ծառայությունը։

«Լեֆորտովոյի դատարանի 2022 թվականի մարտի 22-ի վճիռը թողնվել է անփոփոխ, բողոքը մերժվել է»,- հայտնել է Մոսկվայի քաղաքային դատարանի դատավորը։

Նավալնիի փաստաբանները խնդրել են դատարանին չեղարկել դատավճիռը և արդարացնել իրենց պաշտպանյալին։ Դատախազությունը, սակայն, պահանջել է դատավճիռը թողնել անփոփոխ։ Ընդդիմադիրն ինքը լսումներին մասնակցել է տեսակոնֆերանսի միջոցով։

Որոշման հրապարակումից հետո փաստաբաններից Վադիմ Կոբզևը «Ինտերֆաքս»-ին հայտնել է, որ պաշտպանական կողմը մտադիր է բողոքարկել Մոսկվայի քաղաքային դատարանի որոշումը։ Դատարանի որոշմամբ՝ Նավալնիի նկատմամբ դատավճիռը մտել է ուժի մեջ, մոտ ապագայում նա կտեղափոխվի խիստ ռեժիմի գաղութ։

Մարտի 22-ին Լեֆորտովոյի դատարանը Վլադիմիրի մարզում արտագնա նիստում Նավալնիին դատապարտել է 9 տարվա ազատազրկման խիստ ռեժիմի գաղութում և 1,2 միլիոն ռուբլու տուգանքի՝ «հատկապես խոշոր չափերի խարդախության և դատարանի նկատմամբ անհարգալից վերաբերմունքի» մեղադրանքով։

Ինքը՝ ընդդիմադիր գործիչը, մատնանշել է, որ այս գործով երկու «տուժածներ» ցուցմունք են տվել, երբ իրենք հայտնվել են քննչական մեկուսարանում։ Մեղադրող կողմի մեկ այլ վկա Ֆյոդոր Գորոժանկոն դատարանում հայտարարել է, որ քննիչն իր վրա ճնշում է գործադրել՝ պահանջելով տալ անհրաժեշտ ապացույցները։ Դրանից հետո Գորոժանկոն լքել է Ռուսաստանը։

Մայիսի սկզբին Նավալնին հայտարարել էր, որ իրեն պատրաստվում են տեղափոխել Վլադիմիրի շրջանի Մելեխովոյի խիստ ռեժիմի թիվ 6 ուղղիչ գաղութ։ Այս մասին նա իմացել է այլ բանտարկյալներից, ովքեր նրան ասել են, որ գաղութն իր համար «բանտը՝ բանտի մեջ» պայմաններ է նախապատրաստում։