Երևանում հաստաբուն ծառը տապալվել է մեքենաների վրա․ ՏԵՍԱՆՅՈՒԹ

Այսօր արտակարգ դեպք է տեղի ունեցել Երևանում։ Արամի փողոցում հաստաբուն բարդին արմատից պոկվել և ընկել է տարածքում կայանած մեքենաների վրա։ Նախնական տվյալներով՝ տուժողներ չկան։ Երևանի քաղաքապետարանից Factor.am-ին հայտնեցին, որ այս պահի տվյալներով դա քաղաքում միակ ահազանգն է։ Ինչ վերաբերում է վնասված մեքենաների սեփականատերերիփոխհատուցման խնդրին, քաղաքապետարանի տեղեկատվության և հասարակայնության հետ կապերի վարչության պետ Տարոն Գևորգյանը նշեց, որ ուսումնասիրություն պետք է իրականացվի՝ պարզելու համար դեպքի պատճառը։

«Ծառի անկման փաստը ինքնին մի քանի զարգացումներ կարող է ունենալ։ Նախ տուժող կողմը` մեքենայի սեփականատերը, բոլոր դեպքերում կարող է դիմել Երևանի քաղաքապետարան, գրավոր դիմումի մեջ ներկայացնելով փաստը, օրը, մոտավոր ժամը և վնաս կրելը փաստագրող լուսանկարներ։ Հետագայում, ըստ մասնագիտական ուսումնասիրության, պարզ կլինի որքանով է քաղաքապետարանի կողմից փոխհատուցման ենթակա դեպք։ Դա պարզ է դառնալու այդ դիմումի հիման վրա սկսվող վարույթից։ Մասնագիտորեն հիմնավորվելու է, ճշտվելու է տվյալ օրվա եղանակային պայմանները, քամու ուժգնացումը։ Երկրորդ հանգամանքը այն է, որ այդ ծառի մասնագիտական ուսումնասիրության արդյունքում պետք է հիմնավորվի ծառարմատի փտած է եղել, թե կանաչ ծառ է շուռ եկել։ Գործը ընթացք ստանալու համար տուժող կողմը պետք է գրավոր դիմում ներկայացնի, ուսումնասիրման։ Եթե ամեն ինչ ապացուցվի գործը կգնա դեպի փոխհատուցում, կամ կհիմնավորվի մերժումը։ Պարտադիր դիտարկել որպես փոխհատուցման ենթակա թեմա, չի կարելի»,- նշեց Գևորգյանը։