14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Կիևի դատարանը ռուս զինվորականին դատապարտել է ցմահ ազատազրկման
Քաղաքականություն
23.05.2022 | 15:21
Կիևի Սոլոմենսկի շրջանային դատարանը մայիսի 23-ին ռուս զինծառայող Վադիմ Շիշիմարինին մեղավոր է ճանաչել Սումիի շրջանում քաղաքացիական անձի սպանության մեջ և դատապարտել ցմահ ազատազրկման։ Նա դարձել է առաջին ռուս զինվորականը, որը դատարանի առաջ է կանգնել ռազմական հանցագործությունների մեղադրանքով, գրում է DW-ի ռուսական ծառայությունը։
Սերժանտը դատարանում հայտարարել է, որ ընդունում է իր մեղքը Սումիի շրջանում քաղաքացիական անձի՝ 62-ամյա Ալեքսանդր Շելիպովի սպանության մեջ։
«Ես դա համարում եմ անընդունելի և քրեորեն պատժելի։ Պատժի առավելագույն չափաբաժնով։ Ես չեմ հերքում իմ մեղքը»,- մայիսի 19-ին հայտարարել է ռուս զինվորականը։
Շիշիմարինի խոսքով՝ ինքը հասկացել է, որ կրակում է քաղաքացիական անձի վրա և կարող էր այլ կերպ վարվել այդ իրավիճակում՝ «միայն վախեցնել»: Փաստաբան Վիկտոր Օվսյաննիկովը խնդրել է արդարացնել մեղադրյալին։ Նրա խոսքով՝ Շիշիմարինը հանցավոր հրաման է կատարել՝ ցանկանալով փրկել իր կյանքը։
Խոսելով կատարվածի մասին՝ 21-ամյա Շիշիմարինը պատմել է, որ այդ օրը ինքը Չուպախովկա գյուղում երեք այլ զինվորականի հետ վարել է մեքենան, որը նրանք գողացել են այն բանից հետո, երբ իրենց ավտոշարասյունը ջախջախվել է։
Տեսնելով, որ Շելիպովը խոսում է հեռախոսով, զինվորականներից մեկը հրամայել է Շիշիմարինին սպանել քաղաքացիական անձին, որպեսզի վերջինս չհանձնի նրանց ուկրաինացի զինվորականներին։
«Անհայտ անձը շրջվեց դեպի ինձ ու սկսեց բղավել, որ կրակեմ, քանի որ ես իրենց վտանգի տակ եմ դնում։ Երբ կրակեցի, նա ասաց, որ չանհանգստանամ, որ առաջին հերթին մեզ պետք է փրկել։ Ես չէի ուզում սպանել նրան: Ես կրակեցի, որ ինձ հանգիստ թողնեն»,- ասել է Շիշիմարինը:
Տաթև Ֆռանգյան
