08.06.2026 | 14:30
Ուկրաինայի Գերագույն ռադայի նախագահը շնորհավորել է Ալեն Սիմոնյանին ընտրություններում տարած հաղթանակի առիթով
Սկսվել է Ծիծեռնակաբերդի խճուղու փլուզված ճանապարհի վերակառուցումը, կաշխատեն գիշերային հերթափոխով
23.05.2022 | 12:07
Ծիծեռնակաբերդի խճուղու մի հատվածի փլուզման հետևանքով 200 գծամետր խողովակաշար է վնասվել։ Այս մասին այսօր Երևանի քաղաքապետարանի գործակարգավարական խորհրդակցության ժամանակ հայտնեց «Երևան» ջրօգտագործողների ընկերության գործադիր տնօրեն Սամվել Մելքոնյանը։
Նա նաև հայտնեց, որ ջրագծի վերականգնման շուրջ կառուցապատողի հետ արդեն պայմանավորվածություն է ձեռք բերվել։
Երևանի քաղաքապետ Հրաչյա Սարգսյանն իր տեղակալ Կամո Արեյանին հիշեցրեց, որ Ծիծեռնակաբերդի խճուղում փլուզված հատվածի վերականգնման համար որոշվել էր 24 ժամ աշխատանք կատարել. «Բայց երեկ ես ժամը տասի կողմերն էի այնտեղ, տեխնիկա չէր աշխատում»:
Արեյանը հայտնեց, որ քաղաքապետի հանձնարարականի կատարումը սկսվել է։
«Փլվածքի ամբողջ երկայնքով պետք է ճանապարհը վերակառուցվի, իրականացվեն ամրացման աշխատանքներ։ Պետք է վերականգնվեն նաև գործող ստորգետնյա կոմունիկացիաները։ Առայժմ գազատարին ձեռք չի տրվել, որովհետև առայժմ դրա անհրաժեշտությունը չկա։ Հեղեղատար համակարգն ամբողջությամբ կվերակառուցվի նորովի, այդ թվում` ոռոգման խողովակը, որը երեկ նկատել ենք»,– ասաց Արեյանը` հավելելով, որ ամրացման տեխնոլոգիան վերջնականապես որոշելուց, հաշվարկները կառուցապատողի հետ համաձայնեցնելուց հետո` առաջիկա 1-2 օրվա ընթացքում արդեն կսահմանվի եռահերթ աշխատանքային ռեժիմ՝ այդ թվում նաև գիշերային հերթափոխով:
Մանրամասները՝ տեսանյութում:
