15.01.2025 | 09:30
ՀՀ տարածքում կա փակ ավտոճանապարհ
Էրդողանը հայտարարել է, որ «քուրդ ահաբեկիչներին» ակտիվ աջակցություն են ցուցաբերում Գերմանիայում, Ֆինլանդիայում և Շվեդիայում
Քաղաքականություն
20.05.2022 | 18:34
Թուրքիայի նախագահ Ռեջեփ Թայիփ Էրդողանը կրկին հայտարարել է, որ ներկա պայմաններում Անկարան չի կարող համաձայնություն տալ ՆԱՏՕ-ին Ֆինլանդիայի ու Շվեդիայի անդամակցությանը, գրում է «Անադոլու» գործակալությունը։
Ստամբուլում ուրբաթօրյա աղոթքից հետո լրագրողների հետ զրույցում Էրդողանը հայտնել է, որ այսօր Նիդեռլանդների վարչապետի հետ քննարկել է Ստոկհոլմի և Հելսինկիի դիմումի հարցը, իսկ շաբաթ բանակցություններ են նախատեսված Մեծ Բրիտանիայի և Ֆինլանդիայի ներկայացուցիչների հետ։
Նա Եվրոպական միությանը մեղադրել է երկակի ստանդարտների մեջ «PKK ահաբեկչական կազմակերպության և նրա ճյուղերի դեմ պայքարում, որոնք իրական վտանգ են ներկայացնում Թուրքիայի ազգային անվտանգության համար»։ Էրդողանն ասել է, որ ԵՄ-ն PKK-ին ճանաչում է որպես ահաբեկչական կազմակերպություն, սակայն կազմակերպության սիրիական թևին՝ YPG-ին, այդպիսին չի համարում։
«Ճանաչելով PKK-ի սպառնալիքը՝ նրանք YPG-ին չեն ճանաչում որպես ահաբեկիչներ, չնայած սրանք նույն մետաղադրամի կողմերն են։ Այս ահաբեկչական կազմակերպության ներկայացուցիչների հետ երկխոսություն կա ոչ միայն ԵՄ-ում, այլ նույնիսկ ԱՄՆ-ում»,- ասել է Թուրքիայի նախագահը։
Նրա խոսքով՝ ահաբեկիչներին ակտիվ աջակցություն են ցուցաբերում Գերմանիայում, Ֆինլանդիայում և Շվեդիայում։
«Ահաբեկիչներն ակտիվորեն գործում են Շվեդիայում, Ֆինլանդիայում ու հատկապես Գերմանիայում։ Երբ Թուրքիան պահանջում է նրանց արտահանձնել, մեզ մերժում են։ Երկկողմ բանակցություններում մենք բազմիցս հայտարարել ենք նման մոտեցման անթույլատրելիության մասին։ Թուրքիան երկար տարիներ պայքարում է այս ահաբեկիչների դեմ»,- ասել է Էրդողանը՝ նշելով, որ այդ «ահաբեկիչների աջակիցները շարունակում են օգտվել ԵՄ անդամ երկրների խորհրդարանների հարթակներից»։
Էմմա Չոբանյան
