20.12.2025 | 18:06
Ֆուտզալի միջազգային ընկերական մրցաշարի մասնակիցներից մեկը չի ժամանել Երևան
Ցուցարար ընդդիմադիր պատգամավորներին թույլ չեն տվել մտնել «Ժողովրդավարության հայկական ֆորում»-ի դահլիճ
20.05.2022 | 15:00
Ընդդիմադիր ցուցարարներն այսօր բողոքի ակցիա էին իրականացնում «Արմենիա Մարիոթ» հյուրանոցի առջև, որտեղ շարունակվում է «Հայկական ժողովրդավարություն» խորագրով համաժողովը։ Ցույցի մասնակիցներից ԱԺ պատգամավոր, «Պատիվ ունեմ» խմբակցության քարտուղար Հայկ Մամիջանյանը հայտարարեց, որ «իրենք ցանկանում են ներսում գտնվողներին ցույց տալ Հայաստանում տիրող իրական ժողովրդավարությունը», որից հետո «Հայաստան» և «Պատիվ ունեմ» խմբակցությունների մի քանի պատգամավորներ մտան հյուրանոց։
Լրատվամիջոցներին չթույլատրեցին ընդդիմադիր պատգամավորների հետ շենք մտնել, իսկ Ագնեսա Խամոյանը ֆեյսբուքայն ուղիղ եթերով հայտարարեց, որ իրենց թույլ չեն տալիս մուտք գործել այն սրահ, որտեղ ընթանում է համաժողովը։
Քիչ անց պատգամավորները դուրս եկան հյուրանոցից և հայտարարեցին, որ դադարեցնում են բողոքի ակցիան հյուրանոցի դիմաց և քայլում են դեպի Ֆրանսիայի հրապարակ, որտեղ էլ ժամը 16․30-ին հանրահավաք է նախատեսված։
Ընդդիմադիր պատգամավորները հայտնել են, որ համաժողովին մասնակցում են միայն իշխանական պատգամավորներ։
Հիշեցնենք՝ «Ժողովրդավարության հայկական ֆորումը» կազմակերպել են «Իրազեկ քաղաքացիների միավորումը» և Freedom House-ը։
«Իրազեկ քաղաքացիների միավորում» հասարակական կազմակերպության ծրագրերի համակարգող Դանիել Իոաննիսյանը ֆեյսբուքյան գրառմամբ հայտնել է, որ ֆորումին հրավիրված են եղել իշխանության ու ընդդիմության ոչ բոլոր պատգամավորները, իսկ հրավեր ստացած բոլոր պատգամավորների ու այլ հյուրերի մուտքը եղել է անխոչընդոտ։
Արփի Հակոբյան
