28.06.2026 | 20:00
«Կյանքս կտամ», քարսիթ՝ ոչ. ինչու են ճանապարհին երեխաներ մահանում․ ՏԵՍԱՆՅՈւԹ
Թուրքիայում գնաճի դինամիկան ամենավատն է վերջին 30 տարում․ թուրք հայտնի տնտեսագետ
Քաղաքականություն
19.05.2022 | 23:14
«Թուրքիայում գնաճի դինամիկան իմ տեսածներից ամենավատն է», նման հայտարարություն է արել տնտեսագետ Ջևդեթ Աքչայը՝ հավելելով, որ 30 տարի ուսումնասիրում է երկրում գների փոփոխությունները, գրում է «Ահվալ» գործակալությունը։
«Մենք տեսել ենք գնաճի ավելի բարձր մակարդակ, սակայն դինամիկայի առումով այդքան վատ մակարդակ չենք տեսել»,- ասել է Աքչայը, որն աշխատել է Գանձապետարանի և ֆինանսների նախարարությունում որպես խորհրդատու, ինչպես նաև պետական և խոշոր ֆինանսական հաստատություններում։
Թուրքիայում սպառողական գնաճն անցյալ ամիս հասավ 70 տոկոսի, որը վերջին 20 տարվա ամենաբարձր ցուցանիշն է։ Այս երկրում գնաճն ամենաբարձրն է զարգացող շուկաներում և արդյունաբերական զարգացած տնտեսություններում։
Աքչայը նշել է, որ իրեն ոչ այնքան մտահոգում է, թե որքան բարձր կլինի գնաճը, այլ այն, թե որտեղ այն կհայտնվի, երբ այն, ի վերջո, դանդաղի: Ըստ նրա՝ դա աղետ կլինի, եթե գնաճը իջնի, իսկ հետո խրվի 1930-ականների մակարդակում։
«Այս հարաբերական գները շատ անկայուն են: Գնաճը նվազեցնելու համար նախ պետք է այս հարաբերական գնային քաոսը մարի»,- ասել է նա՝ նշելով, որ կառավարությունն ասել է, որ կբարձրացնի գնողունակությունը՝ օգնելու մարդկանց հաղթահարել գնաճը, սակայն կա վտանգ, որ գնողունակությունն ամբողջությամբ կվերանա։
Տնտեսագետն ասել է, որ Կենտրոնական բանկը, որը նվազեցրել է տոկոսադրույքներն անցյալ տարվա վերջին, կարծես թե, անհանգստացած չէ գնաճից։ Բայց մարդիկ վստահության կարիք ունեն հաստատության և կառավարության նկատմամբ, որ թանկացումները կդանդաղեն։
«Նրանք խուճապի չեն մատնվում գնաճից, նրանք խուճապի են մատնվում այլ բաների համար: Համոզված եմ, որ ղեկավարությունը խուճապի մեջ է փոխարժեքի հետ կապված: Բայց շատ տարօրինակ է, որ գնաճից խուճապի չեն մատնվում, քանի որ այս գնաճը խաթարում է ակտիվների բոլոր գները և հանգեցնում վատ բալանսի»,- ասել է Աքչայը:
Էմմա Չոբանյան
