15.01.2025 | 14:02
36-ամյա տղամարդը դանակով հարվածել է հարևանին
Ֆինլանդիան և Շվեդիան չեն ցանկանում միջուկային սպառազինություն և ՆԱՏՕ-ի բազաներ տեղակայել իրենց տարածքներում
Քաղաքականություն
19.05.2022 | 17:26
Ֆինլանդիան չի ցանկանում, որ ՆԱՏՕ-ն իր տարածքում միջուկային զենք կամ ռազմակայաններ տեղակայի, նույնիսկ եթե միանա դաշինքին։ Այս մասին իտալական Corriere della Sera պարբերականին տված հարցազրույցում ասել է վարչապետ Սաննա Մարինը, փոխանցում է VOA-ն։
Ֆինլանդիան և Շվեդիան ՆԱՏՕ-ին անդամակցելու պաշտոնական հայտ են ներկայացրել չորեքշաբթի: Մարինը Corriere della Sera-ին ասել է, որ միջուկային զենքի տեղակայման կամ Ֆինլանդիայում ՆԱՏՕ-ի բազաների բացման հարցը չի մտնում Հելսինկիի՝ արևմտյան ռազմական դաշինքին միանալու բանակցությունների մեջ։
«Չեմ կարծում, որ Ֆինլանդիայում շահագրգռվածություն կա միջուկային զենք տեղակայելու կամ ՆԱՏՕ-ի բազաներ բացելու հարցում»,- ասել է նա:
Ֆինլանդիայի հետ ՆԱՏՕ-ին անդամակցելու հայտ է ներկայացրել նաև հարևան Շվեդիան, որի վարչապետ Մագդալենա Անդերսոնը նույնպես ասել է, որ իր երկիրը չի ցանկանում ՆԱՏՕ-ի մշտական բազաներ կամ միջուկային զենք ունենալ իր տարածքում։
Սպասվում է, որ հինգշաբթի Վաշինգտոնում Ֆինլանդիայի նախագահ Սաուլի Նիինիստոն և Շվեդիայի վարչապետ Անդերսոնը կհանդիպեն ԱՄՆ նախագահ Ջո Բայդենի հետ։
Տաթև Ֆռանգյան
