07.02.2026 | 11:14
Արտարժույթների փոխարժեքները՝ փետրվարի 7-ի դրությամբ
Թուրքիան և ՄԱԿ-ը մարդասիրական միջանցքներ են կազմակերպում հացահատիկով ուկրաինական նավերի համար
Քաղաքականություն
19.05.2022 | 13:31
Թուրքիայի իշխանություններն աշխատում են ՄԱԿ-ի հետ՝ հացահատիկով բեռնված ուկրաինական նավերի անվտանգ անցման ուղղությամբ։ Այս մասին հայտարարել է Թուրքիայի արտաքին գործերի նախարար Մևլութ Չավուշօղլուն պարենային անվտանգությանը նվիրված համաժողովի ժամանակ, որը տեղի է ունեցել մայիսի 18-ին ԱՄՆ-ում, գրում է korrespondent-ը։
«Մենք աջակցում ենք ՄԱԿ-ի գլխավոր քարտուղարի ջանքերին՝ ստեղծելու մարդասիրական միջանցքներ՝ պարենային անվտանգությունն ապահովելու համար: ՄԱԿ-ի հետ միասին մենք աշխատում ենք հացահատիկով բեռնված ուկրաինական նավերի անվտանգ անցումն ապահովելու ուղղությամբ»,- ասել է նա։
Թուրք նախարարը նաև ասել է, որ համաժողովի մասնակիցները պայմանավորվել են պարենային ճգնաժամի շուրջ միջերկրածովյան երկխոսությունը սկսել նախարարների մակարդակով։ Խմբում համանախագահելու է Թուրքիան։
Ավելի վաղ The Wall Street Journal-ը հայտնել էր, որ ՄԱԿ-ի գլխավոր քարտուղար Անտոնիո Գուտերեշն առաջարկել է թուլացնել Ռուսաստանից և Բելառուսից կալիումային պարարտանյութերի արտահանման սահմանափակումները՝ ուկրաինական նավահանգիստներն ապաշրջափակելու դիմաց։
Մոսկվան հաստատել է, որ համապատասխան բանակցությունները շարունակվում են։
Տաթև Ֆռանգյան
