20.08.2026 | 16:06
Ազատ ոճի հայ ըմբիշներն անհաջող մեկնարկեցին Մ-20 ԱԱ-ում
Զախարովան՝ Մոսկվայի «խորհրդատվական աջակցությամբ» հայ-ադրբեջանական սահմանի սահմանագծման հարցերով երկկողմ հանձնաժողովի ստեղծման մասին
Քաղաքականություն
18.05.2022 | 20:37
Ռուսական կողմը բարձր է գնահատում եռակողմ աշխատանքային խմբի գործունեությունը և ակնկալում է, որ մոտ ապագայում հնարավոր կլինի գործնական աշխատանք սկսել հայ-ադրբեջանական սահմանի սահմանազատման ուղղությամբ։ Այս մասին ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Մենք հետևողականորեն կողմ ենք հանդես գալիս Ռուսաստանի խորհրդատվական աջակցությամբ հայ-ադրբեջանական սահմանի սահմանագծման և դրա հետագա սահմանազատման հարցերով երկկողմ հանձնաժողովի ստեղծմանը։ Աշխատանքի մեկնարկին զուգահեռ, ինչպես ամրագրված է 2021 թվականի նոյեմբերի 26-ի Սոչիի գագաթնաժողովին հաջորդած ղեկավարների եռակողմ հայտարարության մեջ, պետք է քայլեր ձեռնարկվեն երկու երկրների սահմանին կայունության և անվտանգության մակարդակը բարձրացնելու ուղղությամբ»,- ասել է նա։
Զախարովան ընդգծել է, որ Ռուսաստանի Դաշնությունն «ունի հետխորհրդային տարածքում սահմանային վեճերի լուծման ոլորտում եզակի փորձագիտական ներուժ»։
«Մենք ուրախ կլինենք մեր լավագույն փորձը կիսել մեր հայ և ադրբեջանցի գործընկերների հետ հանձնաժողովի գործունեության շրջանակում»,- ասել է ՌԴ ԱԳՆ ներկայացուցիչը։
Նա անդրադարձել է նաև Սոթքի հանքավայրի ուղղությամբ օրեր առաջ ադրբեջանական կողմից հրադադարի ռեժիմի խախտմանը՝ նշելով, որ ցանկացած տեսակի սահմանային միջադեպերը կանխելու համար պահանջվում է հայ-ադրբեջանական սահմանի սահմանազատման հանձնաժողովի աշխատանքների շուտափույթ մեկնարկը։
Տաթև Ֆռանգյան
