20.08.2026 | 16:06
Ազատ ոճի հայ ըմբիշներն անհաջող մեկնարկեցին Մ-20 ԱԱ-ում
Հունաստանի վարչապետն ԱՄՆ Կոնգրեսում իր ելույթում կոչ է արել Թուրքիային զենք չվաճառել
Քաղաքականություն
18.05.2022 | 19:50
Հունաստանի վարչապետ Կիրիակոս Միցոտակիսը ԱՄՆ Կոնգրեսում ունեցած ելույթում հանդես է եկել Վաշինգտոնի կողմից Թուրքիային զենքի վաճառքի դեմ՝ ասելով, որ նման քայլը կարող է լրացուցիչ անկայունություն ստեղծել տարածաշրջանում, գրում է The Hill-ը։
«Վերջին բանը, որ անհրաժեշտ է ՆԱՏՕ-ին այն ժամանակ, երբ մեր ուշադրությունը կենտրոնացած է Ուկրաինային օգնելու ուղղությամբ, որ նա հաղթի Ռուսաստանի ագրեսիան, ՆԱՏՕ-ի հարավարևելյան թևում անկայունության ևս մեկ աղբյուրն է։ Ես ձեզ խնդրում եմ հաշվի առնել դա, երբ որոշումներ եք կայացնում Արևելյան Միջերկրական ծովի առնչվող պաշտպանական գնումների վերաբերյալ»,- ասել է Միցոտակիսը՝ նկատի ունենալով Թուրքիային, սակայն անունը չնշելով։
ԱՄՆ նախագահ Ջո Բայդենի վարչակազմը դիմել է Կոնգրեսին՝ հավանություն տալու ՆԱՏՕ-ի դաշնակից Թուրքիային առաջադեմ սպառազինությունների և այլ ռազմական տեխնիկայի վաճառքին։
Միցոտակիսը նաև խոսել է հունական կղզիների վրայով թուրքական թռիչքների մասին՝ նշելով, որ դրանք պետք է անհապաղ դադարեցվեն։
«Ես ուզում եմ միանգամայն հստակ ասել, որ մենք չենք ընդունի բացահայտ ագրեսիայի գործողությունները։ Հունաստանը նույնպես ՆԱՏՕ-ի դաշնակից է»,- ասել է Հունաստանի ղեկավարը:
Նա նաև նշել է, որ Հունաստանը երբեք չի ընդունի Կիպրոսի երկու պետության բաժանումը։
Հավելենք, որ այցով ԱՄՆ-ում գտնվող Կիրիակոս Միցոտակիսն ավելի վաղ հանդիպել է նախագահ Ջո Բայդենին։
Էմմա Չոբանյան
