26.11.2024 | 13:36
Դատախազությունն ընթացք է տվել Գոռ Վարդանյանի սերիալի առնչությամբ ԿԳՄՍՆ-ի դիմումին
ԱՄՆ-ը վստահ է՝ կոնսենսուս կա ՆԱՏՕ-ին Շվեդիայի ու Ֆինլանդիայի անդամակցության հարցում՝ չնայած Թուրքիայի դիրքորոշմանը
Քաղաքականություն
18.05.2022 | 13:26
ԱՄՆ-ը պնդում է, որ ՆԱՏՕ-ին Շվեդիայի և Ֆինլանդիայի անդամակցության հարցում դաշինքի ներսում կա ուժեղ աջակցություն՝ չնայած Թուրքիայից հնչող հակասական հայտարարություններին։ Մասնավորապես, նախօրեին ճեպազրույցի ընթացքում Պետքարտուղարության խոսնակ Նեդ Փրայսը, պատասխանելով սկանդինավյան երկրների՝ ՆԱՏՕ-ին անդամակցելու հարցում Թուրքիայի նախագահ Ռեջեփ Թայիփ Էրդողանի դիրքորոշման մասին հարցին, ասել է, որ այն պետք է ուղղել թուրքական կառավարությանը։
«Պետքարտուղար Բլինքենը, որը հանգստյան օրերին հնարավորություն ուներ մասնակցել Բեռլինում տեղի ունեցած ԱԳ նախարարների քննարկումներին, նույն վստահությունն ունի, որ ամուր կոնսենսուս կա Ֆինլանդիային և Շվեդիային դաշինք ընդունելու համար, եթե նրանք որոշեն միանալ, և մենք համոզված ենք, որ կարող ենք պահպանել այդ կոնսենսուսը»,- ասել է Փրայսը։
Նա նաև նշել է, որ պետքարտուղար Էնթոնի Բլինքենը Բեռլինում հանդիպել է Թուրքիայի ԱԳ նախարար Մևլութ Չավուշօղլուին։ Բացի այդ, ՄԱԿ-ում միջոցառման ժամանակ ևս նման հանդիպման հնարավորություն է լինելու։
Հավելենք, որ Թուրքիայի ԱԳ նախարարը մասնակցելու է մայիսի 18-ին Նյու Յորքում ՄԱԿ-ի կենտրոնակայանում կայանալիք Գլոբալ պարենային անվտանգության հարցերով նախարարական հանդիպմանը, առանձին հանդիպում է ունենալու նաև ԱՄՆ պետքարտուղար Էնթոնի Բլինքենի հետ։
Հիշեցնենք՝ Թուրքիայի նախագահ Ռեջեփ Թայիփ Էրդողանն ավելի վաղ ևս հայտարարել էր, որ իր երկիրը դրական չի վերաբերվում ՆԱՏՕ-ին Շվեդիայի և Ֆինլանդիայի անդամակցությանը՝ քրդական զինյալ խմբավորումներին այդ երկրների աջակցության պատճառով։
Էմմա Չոբանյան
