08.06.2026 | 14:09
Ընտրություններից հետո հնարավոր սրման մասին հայտարարած անձը ձերբակալվել է
Հունաստանի վարչապետը Ջո Բայդենի հետ հանդիպմանը հաստատել է, որ Աթենքը հետաքրքրված է ամերիկյան F-35-երի գնմամբ
Քաղաքականություն
17.05.2022 | 20:36
Հունաստանի վարչաապետ Կիրիակոս Միցոտակիսը ԱՄՆ նախագահ Ջո Բայդենի հետ հանդիպմանը հաստատել է, որ Աթենքը հետաքրքրված է ամերիկյան արտադրության F-35 կործանիչների գնմամբ, և որ ամերիկյան առաջատար պաշտպանական կապալառուն ձգտում է ներդրումներ կատարել երկրի օդատիեզերական արդյունաբերության ոլորտում, գրում է ekathimerini-ին։
«Մենք սկսելու ենք F-35 կործանիչների էսկադրիլիա ձեռք բերելու գործընթացը և հույս ունենք, որ կկարողանանք այս ֆանտաստիկ ինքնաթիռն ավելացնել Հունաստանի ռազմաօդային ուժերի սպառազինությունում մինչև այս տասնամյակի վերջը: Եվ ես ուրախ եմ, որ ուրբաթ Lockheed Martin-ը պաշտոնապես հայտնեց իր շահագրգռվածությունը Հունաստանի օդատիեզերական ոլորտում ներդրումներ կատարելու հարցում»,- ասել է Միցոտակիսը Բայդենի հետ կայացած ընդունելության ժամանակ։
Բայդենն իր հերթին նշել է, որ երկու երկրները միասին աշխատում են կլիմայի և էներգետիկայի, առևտրի և ներդրումների, պաշտպանության ու աղետներին արձագանքելու և մի շարք այլ ոլորտներում։
«Չափազանցություն չի լինի ասել, որ այսօր մեր բարեկամությունը, գործընկերությունը և մեր դաշինքն ավելի սերտ ու ամուր են, քան երբևէ։ Միասին մենք ցույց ենք տալիս ժողովրդավարական երկրների ուժն ու կարողությունը՝ միասնաբար գործելու հարցում: Եվ մենք օգնում ենք ուկրաինացիներին «ոչ» ասել ռուսական ագրեսիային։ Եվ մենք «ոչ» ենք ասում բռնակալությանը և այն գաղափարին, որ ավտոկրատիան 21-րդ դարում կգերազանցի ժողովրդավարությանը, որովհետև դա այն է, ինչն այստեղ, իմ կարծիքով, վտանգված է»,- ասել է ԱՄՆ նախագահը։
«Նեոկայսերական պատրանքները պատկանում են այլ դարերի։ Նրանք չպետք է հաջողության հասնեն։ Եվ նրանք չպետք է հաջողության հասնեն ոչ միայն հանուն Ուկրաինայի, այլ շատ հստակ ազդանշան ուղարկեն մյուս ավտորիտար առաջնորդներին, որ ինքնիշխանության ցանկացած խախտում կդիմավորվի միասնական և ուժային պատասխանով»,- իր հերթին ասել է Հունաստանի վարչապետը՝ ակնարկելով Թուրքիային։
Էմմա Չոբանյան
