24.03.2026 | 12:43
Պայմանավորվե՞լ եք Ալիևի հետ, որ ասում եք՝ պատերազմ է լինելու. հարց Ալեն Սիմոնյանին․ ՏԵՍԱՆՅՈՒԹ
ՀԱՊԿ-ն ոտքից գլուխ մեղավոր է ՀՀ-ի առաջ․ Նիկոլ Փաշինյանի ձայնը շատ ավելի բարձր կարող էր լինել․ Անահիտ Ադամյան․ ՏԵՍԱՆՅՈՒԹ
Քաղաքականություն
17.05.2022 | 21:17
«ՀԱՊԿ-ն ոտքից գլուխ մեղավոր է Հայաստանի առաջ, և այդ առումով Նիկոլ Փաշինյանի ձայնը կարող էր շատ ավելի բարձր, հիմնավոր լինել ՀԱՊԿ-ի 30-ամյակին նվիրված մոսկովյան գագաթնաժողովում։ Եվ եթե օգտվենք Լուկաշենկոյի բառապաշարից՝ շատ ավելի անտակտ կարող էր լինել Փաշինյանի խոսքը, որքան անտակտ է ինքը՝ Լուկաշենկոն»,- Factor TV-ի հարցազրույցում այսպիսի գնահատական է հնչեցնում «Հանրապետություն» կուսակցության ներկայացուցիչ, հրապարակախոս Անահիտ Ադամյանը։
ՀԱՊԿ-ի գագաթնաժողովում երեկ ՀՀ վարչապետ Նիկոլ Փաշինյանը քննադատել է դաշինքին՝ Հայաստան ադրբեջանական զինուժի ներխուժմանը պատշաճ չարձագանքելու համար։ Շեշտել է, որ ՀՀ-ն դիմել է ճգնաժամային իրավիճակների մեխանիզմը գործարկելու, բայց արձագանքը չի եղել սպասվածի պես։
Բացի այդ, վարչապետը հիշեցրել է, որ տարիներ շարունակ ՀԱՊԿ անդամ երկրները Բաքվին զենք էին տրամադրում. «Մենք երկար ժամանակ բարձրացնում էինք Հայաստանին ոչ բարեկամ երկրին զենքի վաճառքի հարցը: Այդ զենքն օգտագործվել է Հայաստանի և հայ ժողովրդի դեմ: Դա նույնպես խնդիր է»:
«Հանրապետություն» կուսակցության ներկայացուցիչը հիշեցնում է՝ ՀԱՊԿ-ի անդամները մշտապես դեմ են քվեարկել Հայաստանին միջազգային կառույցներում, 2021-ի մայիսին ադրբեջանական ներխուժման ժամանակ ՀԱՊԿ-ը չօգնեց ՀՀ-ին, և ոչ էլ 44-օրյա պատերազմի ժամանակ։
«Մինչև հիմա ՀԱՊԿ-ը մտածում է՝ ինչպես վարվել ՀՀ-ի սահմանախախտման հետ։ Այդպիսի դաշինք չի լինում։ Գործնականում Նիկոլ Փաշինյանը կարող էր շատ հանգիստ ասել՝ իսկ Հայաստանի ինչի՞ն է պետք այս ՀԱՊԿ-ն։ Բայց դա նշանակելու էր ուղիղ հակադրություն ՌԴ-ի հետ, որի նախագահն է ստեղծել այդ դաշինքը՝ որպես իրեն հենարան»,- ասում է Անահիտ Ադամյանը։
Հարցազրույցն ամբողջությամբ՝ տեսանյութում։
Ռոբերտ Անանյան
