Պուտինն առաջիկայում կարող է այցելել Թուրքիա․ Պեսկովը հաստատել է, սակայն ժամկետ չի նշել

ՌԴ նախագահ Վլադիմիր Պուտինն առաջիկայում կարող է այցելել Թուրքիա։ Այս մասին հաղորդում են թուրքական լրատցամիջոցները՝ նշելով, որ վաղը Ռուսաստանից բարձրաստիճան պատվիրակություն է ժամանելու Անկարա՝ փոխվարչապետ Ալեքսանդր Նովակի գլխավորությամբ։ Պատվիրակությունը հանդիպումներ է ունենալու տնտեսության ոլորտը համակարգող գերատեսչություններում։

Նշվում է, որ Արևմուտքի կողմից Ռուսաստանի դեմ սահմանված պատժամիջոցների պատճառով եվրոպական շատ ընկերություններ դուրս են եկել ռուսական շուկայից։ Այս ամսից Ռուսաստանը չի կարող ԵՄ-ից և Աֆրիկայից որևէ ապրանք գնել։ Պատվիրակությունների միջև հանդիպումների ժամանակ օրակարգում կլինի նաև այս հարցը։ Քայլեր են ձեռնարկվելու, որպեսզի թուրքական ընկերությունները տեղ ունենան ռուսական շուկայում։

Հաղորդվում է, որ քննարկվելու են նաև Ռուսաստանի և Թուրքիայի Բարձր մակարդակով համագործակցության խորհրդի նիստի նախապատրաստական աշխատանքները։
«Նախագահ Ռեջեփ Թայիփ Էրդողանը ՌԴ նախագահ Վլադիմիր Պուտինին զանգահարել ու հրավիրել է Թուրքիա՝ բարձր մակարդակի գործարար հանդիպմանը։ Առաջիկայում սպասվում է Պուտինի այցը Թուրքիա»,- գրում են թուրքական լրատվամիջոցները։

ՌԴ նախագահի մամուլի խոսնակ Դմիտրի Պեսկովն էլ այսօր հայտարարել է, որ Վլադիմիր Պուտինը Թուրքիա այցելելու հրավեր է ստացել, սակայն այդ այցը ներառված չէ նրա մոտ ապագայի ծրագրերում։

«Վլադիմիր Պուտինն իսկապես Թուրքիա այցելելու հրավեր ունի, և նա ասել է, որ անպայման կօգտվի այդ հրավերից։ Այցի ժամկետները կհամաձայնեցվեն, բայց մոտ ապագայի համար պայմանավորվածություններ չկան»,- ասել է Պեսկովը։

Էմմա Չոբանյան