Անկարան հավանություն չի տա ՆԱՏՕ-ին Ֆինլանդիայի և Շվեդիայի անդամակցությանը․ Էրդողան

Թուրքիան չի կարող հավանություն տալ ՆԱՏՕ-ին Ֆինլանդիայի և Շվեդիայի անդամակցությանը, քանի որ այդ երկրները սատարում են ահաբեկչական կազմակերպություններին, նաև Անկարայի դեմ պատժամիջոցներ են կիրառել։ Այս մասին հայտարարել է Թուրքիայի նախագահ Ռեջեփ Թայիփ Էրդողանը Անկարայում Ալժիրի նախագահ Աբդելմաջիդ Թեբբունի հետ մամուլի ասուլիսի ժամանակ, գրում է «Անադոլու» գործակալությունը։

«Մենք չենք ասի «այո» ՆԱՏՕ-ի մուտքին նրանց, որոնք Թուրքիայի դեմ պատժամիջոցներ են կիրառում»,- ասել է Էրդողանը։
Նա նշել է, որ այդ երկրներից ոչ մեկը հստակ և միանշանակ դիրքորոշում չունի ահաբեկչական կազմակերպությունների նկատմամբ։

Էրդողանը նաև մեկնաբանել է Շվեդիայի և Ֆինլանդիայի պատվիրակությունների՝ Թուրքիա այցելելու մտադրությունը՝ քննարկելու ՆԱՏՕ-ին անդամակցելու իրենց երկրների դիմումները։

«Նրանք գալիս են մեզ համոզելո՞ւ։ Թող չնեղանան, բայց կարիք չկա իրենց նեղություն տալու»,- հայտարարել է Թուրքիայի նախագահը։

Հավելենք, որ նախօրեին մամուլում տեղեկություններ տարածվեցին, որ Շվեդիայի, Ֆինլանդիայի և Թուրքիայի ԱԳ նախարարներ Անն Լինդեն, Օեկա Հաավիստոն և Մևլութ Չավուշօղլուն հանդիպելու են Անկարայում, որպեսզի քննարկեն սկանդինավյան այս երկրների՝ ՆԱՏՕ-ին անդամակցելու հարցը։ Հանդիպմանը Թուրքիան նախատեսում է պարզաբանել դաշինքին Շվեդիայի և Ֆինլանդիայի անդամակցության վերաբերյալ իր առարկությունները։

Հիշեցնենք՝ Թուրքիայի նախագահ Ռեջեփ Թայիփ Էրդողանն ավելի վաղ ևս հայտարարել էր, որ իր երկիրը դրական չի վերաբերվում ՆԱՏՕ-ին Շվեդիայի և Ֆինլանդիայի անդամակցությանը՝ քրդական զինյալ խմբավորումներին այդ երկրների աջակցության պատճառով։ ԱԳ նախարար Մևլութ Չավուշօղլուն էլ ասել էր, որ Թուրքիան դեմ չէ ՆԱՏՕ-ի բաց դռների քաղաքականությունը, սակայն մի շարք պայմաններ ունի։

Էմմա Չոբանյան