Պուտինն անձամբ է ղեկավարում Ուկրաինայում զորքերի գործողությունները՝ գնդապետի կամ բրիգադային գեներալի մակարդակով․ The Guardian

ՌԴ նախագահ Վլադիմիր Պուտինն այնքան է ներքաշվել ուկրաինական պատերազմի մեջ, որ օպերատիվ և մարտավարական որոշումներ է կայացնում «գնդապետի կամ բրիգադային գեներալի մակարդակով»։ Այս մասին հայտնում է The Guardian-ը՝ վկայակոչելով արևմտյան ռազմական աղբյուրներին։

Ըստ հրապարակման՝ Պուտինն օգնում է որոշել ուժերի տեղաշարժը Դոնբասում, որտեղ անցյալ շաբաթ ՌԴ ուժերը չեն կարողացել անցնել Ուկրաինայի արևելքում գտնվող ռազմավարական գետը:

Աղբյուրները հավելում են, որ Պուտինը դեռ սերտորեն համագործակցում է Ռուսաստանի զինված ուժերի հրամանատար գեներալ Վալերի Գերասիմովի հետ՝ ի հակադրություն Ուկրաինայի այն պնդումների, որոնք հնչեցվեցին անցյալ շաբաթ, թե ռազմական ղեկավարը պաշտոնանկ է արվել։

«Մենք կարծում ենք, որ Պուտինն ու Գերասիմովը ներգրավված են մարտավարական որոշումների կայացման մեջ այնպիսի մակարդակով, որը սովորաբար ակնկալվում է, որ պետք է ընդունվի գնդապետի կամ բրիգադային գեներալի կողմից»,- ասել է ռազմական աղբյուրը՝ նկատի ունենալով Ուկրաինայի արևելքում ընթացող մարտերը:

Տեղեկացվում է, որ Մոսկվայի Զինված ուժերը մինչ այժմ չեն կարողացել բեկման հասնել Դոնբասում, որտեղ նրանք մեկ ամիս շարունակ հարձակում են իրականացնում, սակայն մի քանի անգամ չի հաջողվել շրջապատել ուկրաինական փոքր ուժերը:

Պարբերականը նշում է, որ այս պնդումները հաստատող այլ մանրամասներ չեն տրամադրվել, թեև ենթադրվում է, որ Պուտինի սերտ անձնական մասնակցության մասին գնահատականը հիմնված է ստացված հետախուզական տվյալների վրա:

Տաթև Ֆռանգյան