14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Շվեդիան դիվանագետների խումբ կուղարկի Թուրքիա՝ փորձելու հաղթահարել ՆԱՏՕ-ին միանալու հետ կապված Անկարայի առարկությունները
Քաղաքականություն
16.05.2022 | 20:05
Շվեդիան դիվանագետների կուղարկի Թուրքիա՝ փորձելու հաղթահարել ՆԱՏՕ-ին միանալու երկրի ծրագրի հետ կապված Անկարայի առարկությունները։ Այս մասին հայտարարել է Շվեդիայի պաշտպանության նախարար Պետեր Հուլտքվիստը, գրում է Reuters գործակալությունը։
Շվեդիայի իշխող Սոցիալ-դեմոկրատական կուսակցությունը նախօրեին համաձայնություն է տվել ՆԱՏՕ-ին երկրի անդամակցելուն, որը հետևում է Ուկրաինա Ռուսաստանի ներխուժմանը։ Ֆինլանդիան ևս նախօրեին հաստատել է, որ դիմում է՝ միանալու դաշինքին։
Սակայն Թուրքիան անակնկալի է բերել ՆԱՏՕ-ին՝ ասելով, որ դրական չի դիտարկում այս երկրների դիմումները․ նախագահ Ռեջեփ Թայիփ Էրդողանը հայտարարել է, որ «Սկանդինավյան երկրներն ահաբեկչական կազմակերպությունների համար հյուրատներ են»։
«Մենք դիվանագետների խումբ կուղարկենք՝ քննարկումներ անցկացնելու և երկխոսելու Թուրքիայի հետ, որպեսզի տեսնենք, թե ինչպես կարող է դա լուծվել և իրականում ինչի մասին է խոսքը»,- ասել է Շվեդիայի պաշտպանության նախարարը SVT հանրային հեռարձակողին տված հարցազրույցում։
Շվեդիայի խորհրդարանն այսօր քննարկում է անցկացնելու երկրի անդամակցության հայտի վերաբերյալ, ինչը ձևական բնույթ է կրում, քանի որ արդեն կա մեծամասնություն հայտի համար: Կառավարությունն էլ պաշտոնապես դիմելու որոշումը կկայացնի ավելի ուշ։
Էմմա Չոբանյան
