18.05.2026 | 23:42
«Անկախ դիտորդ»-ը պահանջում է ազատ արձակել Արթուր Օսիպյանին և պարզաբանում տալ նրա ձերբակալության հիմքերի վերաբերյալ
ՇՊՀ-ում երեք մասնագիտությունների գծով դիմորդներ չկան
Հասարակություն
16.05.2022 | 22:30
Շիրակի պետական համալսարանն այս տարի հայտարարագրել է 24 մասնագիտություններ, ունի 277 դիմորդ։ Երեք մասնագիտությունների՝ հաշվապահական հաշվառում-հարկման, աշխարհագրության և մաթեմատիկայի գծով դիմորդներ չկան։ Այս մասին մեզ տեղեկացրեց բուհի ռեկտոր Երվանդ Սերոբյանը։
«Ես հետևում էի դիմորդների հայտարարագրման էլեկտրոնային ընթացքին, մաթեմատիկայի մասով պիտի ասեմ, որ նման իրավիճակ է նաև Վանաձորում», -ասաց ՇՊՀ ռեկտորը։
Ըստ նրա, թեև դիմորդների պակաս կա բնագիտամաթեմատիկական հոսքում, սակայն այս տարի որոշակի աշխուժություն է նկատվում ինֆորմատիկա-կիրառական մաթեմատիկա, տեղեկատվական տեխնոլոգիաներ, դեղագործական քիմիա բաժիններում։
Ամենաշատ դիմորդներ ունեն բուհի հոգեբանության, ինչպես նաև անգլերեն լեզվի և գրականության բաժինները։ Այս տարի ավելացել է նաև սերվիս բաժինը դիմողների թիվը, նրանք 25-ն են։ Դիմորդների պակաս չունեն նաև ֆիզիկական դաստիարակություն և սպորտային մարզումներ, ինչպես նաև թարգմանչական գործ՝ անգլերեն-հայերեն բաժինները։
«Հումանիտար բլոկում բավականին լավ իրավիճակ ունենք և պատկերը , պետք է ասել, որ կտրուկ փոփոխություն չի կրել։ Մեկ-երկու մասնագիտություններ գծով կան փոփոխություններ, որոնք երևի պայմանավորված են նաև երկրորդ միասնական քննության պարտադիր լինելով», -ասաց բուհի ռեկտորը։
Նշենք, որ հումանիտար հոսքից քիչ դիմորդներ ունեն լրագրություն, ինչպես նաև հայոց լեզու և գրականության բաժինները, լրագրող դառնալու ցանկություն է հայտնել 3 հոգի, հայոց լեզվի և գրականության մասնագետ՝ 5 հոգի։
Արմիկ Մովսիսյան
