ԵՐԵՎԱՆԻ ԺԱՄԱՆԱԿՈՎ. «Առնո Բաբաջանյանի հետ բիլիարդ խաղալուց հետո տարօրինակ է տեսնել նրա քանդակը». Գեորգի Պողոսյան

«Տարօրինակ է, երբ տեսնում ես այն մարդկանց քանդակները, որոնց ժամանակին ճանաչել ես. Առնո Բաբաջանյանի հետ, օրինակ, բիլիարդ եմ խաղացել»,- ասում է մանկաբարձ-գինեկոլոգ Գեորգի Պողոսյանը՝ Factor.am-ի «Երևանի ժամանակով» զրուցաշարի շրջանակում։ Նա խոսում է  մայրաքաղաքի՝ իր կարծիքով  հաջող և անհաջող քանդակների մասին։ 
Գեորգի Պողոսյանը նշում է, որ հավանում է, օրինակ, Մարտիրոս Սարյանի, Ավետիք Իսահակյանի քանդակները, փոխարենը նրան դուր չի գալիս Արամ Խաչատրյանի արձանը:

«Շատ ծանր գործ է, նայում ես,  մտածում ես՝ Ալեքսանդր Առաջինն է, Վիլհելմ Երրորդն է, թե ով է»,- ասում է նա և հավելում. «Հիշում եմ՝ երբ փոքր էի, հենց  Իսահակյան փողոցում հանդիպում էի Վարպետին՝  ճիշտ նույն կերպ, ինչպես ներկայացված է քանդակի դեպքում՝ փայտը մեջքի ետևում պահած»։

Պողոսյանը վերհիշում է նաև Երևանում առաջին վերելակների գործարկումը, մետրոյի  բացումը: «Վախթանգ Անանյանի տղայի հետ էի սովորում, նրանց շենքում վերելակ կար,  վազում էինք իրենց տուն, որ  նստենք»,- պատմում է նա։

Մեր զրուցակիցը, անդրադառնալով  մայրաքաղաքի տեսքին, կարծիք է հայտնում, որ, օրինակ,  լավ կլիներ, եթե Հաղթանակի կամուրջը  շրջապատված լիներ  մեր հաղթանակները խորհրդանշող հայ մեծ զորավարների քանդակներով, այլապես, նրա համոզմամբ,պարզ չէ, թե ինչու է կամուրջը կոչվում «Հաղթանակի»։

Գեորգի Պողոսյանը՝ որպես բժիշկ, խոսում է նաև երևանցիների առողջությանը սպառնացող գործոններից։ Գինեկոլոգի կարծիքով՝ այսօր մայրաքաղաքում ավելի շատ գեղեցիկ աղջիկների ու կանանց կարելի է հանդիպել, քան տարիներ առաջ։

Աննա Բաբաջանյան