Ուկրաինական զորքերը հակագրոհներ են իրականացնում Խարկովի մարզում

Ուկրաինան երկուշաբթի երկրի արևելքում հակահարձակման է անցել ռուսական ուժերի դեմ։ Մեծությամբ երկրորդ քաղաքի՝ Խարկովի շուրջ մարտեր են ընթանում այն բանից հետո, երբ արևմտյան ռազմական գործակալությունները հայտարարեցին, որ Մոսկվայի հարձակումը Դոնբասում դանդաղել է, գրում է VOA-ն։

Ուկրաինայի ՆԳՆ ղեկավարի խորհրդական Վադիմ Դենիսենկոն, ելույթ ունենալով հեռուստատեսությամբ, ասել է, որ Խարկովի մոտ մարտերը դարձել են Ուկրաինայի հակահարձակումը։

«Նրանց այլևս կանգնեցնել չի լինի: Դրա շնորհիվ մենք կարող ենք անցնել ռուսական զորախմբի թիկունքը»,- ասել է նա։

Ուկրաինայի Պաշտպանության նախարարությունը հայտարարել է, որ տարածքային պաշտպանության ուժերի 127-րդ բրիգադի 227-րդ գումարտակը հասել է Ռուսաստանի հետ սահման։

Խարկովի մարզի նահանգապետ Օլեգ Սինեգուբովն էլ հայտարարել է, որ զորքերը վերականգնել են սահմանային ցուցանակը։

Լուգանսկի շրջանի ղեկավար Սերխի Գայդայն իր հերթին նշել է, որ իրավիճակը «բարդ է մնում»՝ հաշվի առնելով, որ ռուսական զորքերը փորձում են գրավել Սևերոդոնեցկը։ Նրա խոսքով՝ ինքնահռչակ Լուգանսկի հանրապետության ղեկավարությունը համընդհանուր զորահավաք է սկսել, որն ընթանում է «կա՛մ կռվիր, կա՛մ քեզ կգնդակահարեն, այլընտրանք չկա» սկզբունքով։

Հավելենք, որ կիրակի ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ ռուսական գրոհը Դոնբասում դանդաղել է, և Ուկրաինան կարող է հաղթել պատերազմում։ Ռազմական փորձագետներից քչերն էին նման հայտարարություններ անում, երբ Ռուսաստանը փետրվարի 24-ին սկսեց ռազմական ներխուժումը։

Տաթև Ֆռանգյան