Չավուշօղլուն նշել է ՆԱՏՕ-ին Շվեդիայի և Ֆինլանդիայի անդամակցության «թուրքական պայմանները»

Թուրքիան ՆԱՏՕ-ի անդամ երկրների ԱԳ նախարարների ոչ պաշտոնական հանդիպմանն իր մտահոգությունն է հայտնել, որ «Շվեդիան և Ֆինլանդիան աջակցություն են ցուցաբերում ահաբեկչական կազմակերպություններին»։ «Անադոլու»-ի փոխանցմամբ՝ այս մասին հանդիպումից հետո մամուլի ասուլիսում հայտարարել է Թուրքիայի ԱԳ նախարար Մևլութ Չավուշօղլուն։

Նա նշել է, որ Թուրքիան միշտ աջակցել է ՆԱՏՕ-ի բաց դռների քաղաքականությանը, և որ դաշնակիցների միջև համերաշխությունը շատ կարևոր է հատկապես սպառնալիքների դեպքում։ Չավուշօղլուն հիշեցրել է, որ նախագահ Ռեջեփ Թայիփ Էրդողանը հնչեցրել է Թուրքիայի դիրքորոշումը Ֆինլանդիայի և Շվեդիայի ՆԱՏՕ-ին անդամակցության հարցում։

Թուրք պաշտոնյան հայտարարել է, որ Թուրքիան ՆԱՏՕ-ի ԱԳ նախարարների ոչ պաշտոնական հանդիպմանը իր մտահոգությունն է հայտնել «Շվեդիայի և Ֆինլանդիայի կողմից ահաբեկչական կազմակերպություններին ցուցաբերվող աջակցության կապակցությամբ»։ Ըստ նրա՝ խոսքը, մասնավորապես, PKK/YPG «ահաբեկչական կազմակերպության» ներկայացուցիչների հետ այդ երկրների պաշտոնյաների բանակցությունների, Շվեդիայի կողմից սպառազինությամբ աջակցության մասին է։

Չավուշօղլուն նաև անընդունելի է համարել Թուրքիայի հետ կապված արտահանման սահմանափակումները այն երկրների կողմից, որոնք մտադիր են միանալ դաշինքին։ Նա ասել է, որ իրենք խոսել են այս հարցում Թուրքիայի մտահոգությունների ու ակնկալիքների մասին։ Ըստ Չավուշօղլուի՝ Շվեդիան և Ֆինլանդիան իրենց հերթին նշել են, որ առաջարկներ ունեն՝ թուրքական կողմի մտահոգությունները լուծելու համար։

Չավուշօղլուն ընդգծել է, որ Շվեդիայի արտաքին գործերի նախարար Անն Լինդեի հայտարարությունները, որոնք նա մինչ օրս արել է, «կառուցողական չեն, դրանք սադրիչ են»։ Իսկ ահա Ֆինլանդիայի արտգործնախարար Պեկկա Հաավիստոյի հայտարարությունները շատ զուսպ են։

«Անպայման պետք է լինեն անվտանգության երաշխիքներ։ Այդ երկրները պետք է դադարեցնեն աջակցել ահաբեկչական կազմակերպություններին։ Արտահանման սահմանափակումներն այնպիսի դաշնակցի համար, ինչպիսին Թուրքիան է, նույնպես պետք է հանվեն»,- ասել է Չավուշօղլուն։

Էմմա Չոբանյան