22.04.2026 | 23:30
ՀՀ տարածքում ավտոճանապարհները հիմնականում անցանելի են
Ռուսաստանը չի համակերպվի Շվեդիայի և Ֆինլանդիայի՝ ՆԱՏՕ-ին անդամակցության հետ․ ՌԴ փոխարտգործնախարար
Քաղաքականություն
16.05.2022 | 13:25
Ռուսաստանը պարզապես չի համակերպվի Ֆինլանդիայի և Շվեդիայի՝ ՆԱՏՕ-ին անդամակցության հետ։ ՌԻԱ Նովոստիի փոխանցմամբ՝ այս մասին հայտարարել է ՌԴ փոխարտգործնախարար Սերգեյ Ռյաբկովը՝ կոչ անելով Արևմուտքին այս հարցում պատրանքներ չունենալ։
«Ռազմական լարվածության ընդհանուր մակարդակը կավելանա, իսկ կանխատեսելիությունն այս ոլորտում կնվազի: Ցավալի է, որ ողջախոհությունը զոհաբերվում է ինչ-որ ուրվական գաղափարների այն մասին, թե ինչ պետք է անել ներկա իրավիճակում»,- ընդգծել է ռուսաստանցի դիվանագետը։
Փոխարտգործնախարարը պարզաբանել է, որ «այս ամբողջ իրավիճակը Շվեդիայի և Ֆինլանդիայի ղեկավարության սխալն է՝ հեռահար հետևանքներով, դա ցույց է տալիս այս երկրներում որոշումներ կայացնողների մակարդակը»։
Նա նշել է, որ ՌԴ-ն իրավիճակը դիտարկում է ամբողջությամբ, և այն արմատապես փոխվում է տեղի ունեցողի ֆոնին։
Ռյաբկովը հավելել է, որ առանձին խնդիր է, թե Ռուսաստանն ինչպես կապահովի իր անվտանգությունը ՆԱՏՕ-ի ընդհանուր կոնֆիգուրացիայի փոփոխությունից հետո։ Որոշումը կախված կլինի երկու երկրների՝ Հյուսիսատլանտյան դաշինքին միանալու կոնկրետ հետևանքներից։
Տաթև Ֆռանգյան
