10.10.2026 | 14:28
ԵՄ-ն շնորհավորել է Երևանի 2808-ամյակը
Ծիծեռնակաբերդի բարձունքի՝ համայնքին պատկանող տարածքում արդեն իսկ 420 ծառ և թուփ է տնկվել
Տնտեսություն
14.05.2022 | 18:20
Ծիծեռնակաբերդի բարձունքի՝ համայնքին պատկանող տարածքում գարնանային ծառատունկ է, տեղեկացնում են Երևանի քաղաքապետարանից։ Դեռևս 2019թ. նախանշված ծավալուն նախագիծը գործնական փուլ մտավ այս տարի: Նախ 8.5 հա համայնքապատկան հատվածում մեծ թափով սանիտարական մաքրման աշխատանքներ սկսվեցին, որի ընթացքին պարբերաբար հետևել է Երևանի քաղաքապետ Հրաչյա Սարգսյանը:
Տարիներ շարունակ անխնամ մնացած անտառային տարածքը կարգի բերելու համար աշխատանքներում ներգրավվեց շուրջ 160 աշխատակից:
«Ավելի քան 400 մեքենա աղբ է տեղափոխվել տարածքից: Այստեղ առկա էին բազալտի մեծ շերտեր, քարեր, մենք այդ ամենը մաքրեցինք այնպես, որ հասնենք հողային շերտին: Բնաբաժակներն ապահովված են անհրաժեշտ բաղադրիչներով հարուստ հողախառնուրդով»,- նշում է «Կանաչապատում և շրջակա միջավայրի պահպանություն» ՀՈԱԿ-ի տնօրեն Տիգրան Հակոբյանը:
Որպեսզի աշխատանքներն արդյունավետ լինեն, մոտեցումներն էլ մասնագիտորեն հիմնավորված՝ տարածքում կատարվեց նաև հողագիտական ուսումնասիրություն, և նմուշառումներն ուղարկվեցին մասնագիտացված կենտրոն:
«Խնդիրն այն էր, որ գետինը հիմնականում ծածկված էր մեծ քարերով, որոնք մաքրել ենք: Մոտավորապես 1.2 մ խորությամբ փոսեր ենք փորել, դրան համապատասխան հողախառնուրդը լցրել փոսերը և նոր միայն ծառատունկ սկսել: Դա ծառերին հնարավորություն է տալիս 2-3 տարի այդ հողախառնուրդում աճել, որից հետո արմատային համակարգը կուժեղանա և արդեն բնական հողում էլ կսկսի բնականոն աճել»,- ասում է
«Կանաչապատում և շրջակա միջավայրի պահպանություն» ՀՈԱԿ-ի գլխավոր դենդրոլոգ Արծվի Գրիգորյանը:
Մարզահամերգային համալիրի արևմտյան հատվածը մասնագետները չորս հատվածի են բաժանել:
Գործընթացն իրականացվում է մի շարք ուղղություններով. ծրագրի այս փուլում աշխատանքներ են տարվում համայնքապատկան մասի շուրջ 2 հա տարածքում: Գարնանային ծառատունկի ընթացքում արդեն իսկ տնկվել է 420 ծառ և թուփ:
«Երևանի զարգացման ծրագրով քաղաքականությունը միտված է կանաչ տարածքների ընդլայնմանը, որի վառ օրինակներից մեկն այս տարածքի վերականգնումն է: Այստեղ հիմնվում է անտառային գոտի: Նաև թփապատման ծավալուն աշխատանքներ ենք քաղաքում իրականացնում, որը երկրորդ շերտի բուսականությունն ավելացնելու հնարավորություն է տալիս: Այն կարևոր նշանակություն կունենա մեքենաների արտանետումները զտելու-կլանելու և օդը մաքրելու գործում»,- ընդգծում է Երևանի քաղաքապետարանի բնապահպանության վարչության պետ Գևորգ Նազարյանը:
Քաղաքապետարանի տարեկան ծրագրով լուծվեց նաև ոռոգման ցանցի խնդիրը: Ջուրը տարածք հասցնելու նպատակով փոխվել է ջրագիծը: Այս ծավալուն նախագիծը, բնապահպանական նշանակությունից բացի, ունի ևս մեկ կարևոր խորհուրդ՝ խնամված, ակնահաճո միջավայր ստեղծել հայության համար խորհրդանշական Ծիծեռնակաբերդի հուշահամալիրի հարակից տարածքում:
