09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Մեր շարժումը կասեցրել է Արցախի կարգավիճակի հարցում նշաձողի իջեցումը․ Իշխան Սաղաթելյան
Քաղաքականություն
14.05.2022 | 14:52
«Մեր շարժումը կասեցրել է Արցախի հարցում հայկական կողմի՝ նշաձող իջեցնելու գործընթացը»,- Ֆրանսիայի հրապարակում այսօր հրավիրված ասուլիսի ընթացքում ասաց Իշխան Սաղաթելյանը։ Նա ընդդիմության փողոցային պայքարի, իր ձևակերպմամբ, մի քանի ձեռքբերում առանձնացրեց:
««Դիմադրություն» շարժումը ստեղծել է իրական քաղաքական ճգնաժամ, այդ թվում՝ մեր միջազգային գործընկերների համար առնվազն այս պահին ակնհայտ է դառնում Նիկոլ Փաշինյանի լեգիտիմության հարցը։ Շարժումն ապացուցել է, որ հայ ժողովուրդը չի ընդունելու իրեն պարտադրված որևէ զիջում, և Նիկոլ Փաշինյանը չունի մանդատ՝ երկիրը նոր զիջումների տանելու։ Շարժումը ակնհայտ է դարձրել, որ կա հանրային ձևավորված պահանջ այս իշխանություններին հեռացնելու համար»,- հայտարարեց նա։
Իշխան Սաղաթելյանի խոսքով՝ Հայաստանի անկախության պատմության մեջ շարժումը բացառիկ է իր ծավալներով, չափերով և ժողովրդականությամբ։
«Ըստ էության, սա Ղարաբաղյան 2-րդ շարժումն է, որի մաս են կազմում հանրության բոլոր շերտերը։ Մեր շարժումը համաժողովրդական է, որը լինելու է անկասելի»,- ընդգծեց նա։
Անդրադառնալով իշխանափոխության դեպքում ժամանակավոր կառավարության կազմին՝ Սաղաթելյանը նշեց, որ գործադիրը չի ձևավորվելու կուսակցական քվոտաներով։
«Դրանք լինելու են այն քաղաքական ուժերի ներկայացուցիչները, որոնք այս պայքարի ընթացքում և՛ այս հարթակում են, և՛ հարթակից դուրս են, բայց մենք կարևորություն ենք տալիս պոտենցիալ համապատասխան փորձ, գիտելիք, կարող ուժ ներկայացնող անձանց։ Այսինքն՝ ոչ միայն հայտնի քաղաքական դեմքեր են, այլև բազմաթիվ անկուսակցական մարդիկ, որոնք ունեն ներուժ»,- ասաց Սաղաթելյանը։
Հարցին, թե արդյոք իրենց շարքերում օդիոզ դեմքեր կան, Սաղաթելյանը պատասխանեց․ «Այո, երբեմն լինում են մարդիկ, որոնք իրենց գործունեության ընթացքում աչքի են ընկել հասարակության համար անընդունելի դրսևորումներով։ Նման մարդիկ կան տարբեր կուսակցություններում, դաշինքներում, հարթակներում, բայց մենք որևէ մեկին անձնական հրավերով այս հրապարակ չենք հրավիրել և որևէ մեկին չենք արգելել գալ այստեղ։ Հստակ ասում եմ՝ նման մարդիկ հաջորդ իշխանության մեջ որևէ դերակատարություն ու արտոնյալ կարգավիճակ չեն ունենալու»։
Արփի Հակոբյան
