Լոնդոնը հայտարարել է, որ ՌԴ-ի դեմ պատժամիջոցները չպետք է չեղարկել՝ մինչև Ուկրաինայի ամբողջ տարածքից ռուսական զորքերի դուրսբերումը

Մեծ Բրիտանիայի ԱԳ նախարար Լիզ Թրասը հայտարարել է, որ ՌԴ-ի դեմ միջազգային պատժամիջոցները պետք է գործեն մինչև ռուսական ուժերի ամբողջական դուրսբերումը Ուկրաինայի ամբողջ տարածքից, գրում է BBC-ի ռուսական ծառայությունը։

«Պուտինը խայտառակում է իրեն միջազգային ասպարեզում։ Մենք պետք է ապահովենք, որ նա պարտություն կրի Ուկրաինայում, որը նրան որևէ օգուտ չի բերի և, ի վերջո, կզսպի նոր ագրեսիան»,- ասել է Թրասը Գերմանիայում G7-ի ներկայացուցիչների հետ հանդիպման ժամանակ:

Մի քանի շաբաթ առաջ Թրասն արդեն ասել էր, որ պատժամիջոցների վերացման մասին խոսելը հնարավոր է միայն ամբողջական հրադադարի և Ուկրաինայի ողջ տարածքից ռուսական զորքերի դուրսբերման դեպքում։ Նա նաև հայտարարել է, որ Ուկրաինայի դաշնակիցները պետք է Ռուսաստանի դեմ նոր պատժամիջոցների հարցը որոշեն, և նրանք պետք է գնան «արագ ու հեռուն»՝ Ուկրաինային իր պայքարում աջակցելու հարցում։

«Ուկրաինայի երկարաժամկետ անվտանգությունն ապահովելու լավագույն միջոցն այն է, որ նա կարողանա պաշտպանել իրեն: Դա նշանակում է անհրաժեշտություն՝ Ուկրաինային տրամադրել հստակ ուղի ՆԱՏՕ-ի չափանիշներին համապատասխանող զենքերի ստացման համար»,- ասել է Թրասը։

BBC-ի դիվանագիտական թղթակից Ջեյմս Լենդեյլը նշել է, որ նման կատեգորիկ հայտարարության նպատակն է ազդարարել Կրեմլին, որ Մեծ Բրիտանիան պատրաստ չէ որևէ զիջման գնալ ռազմական ագրեսիայի ընթացքում։ Միաժամանակ, Լենդեյլը նաև նշել է, որ նման կոշտ դիրքորոշումն ապագայում կարող է խանգարել ուկրաինական կողմին հրադադարի բանակցությունների ընթացքում։

Էմմա Չոբանյան