20.11.2024 | 11:27
Թմրանյութի հետ կապ չունեմ, եթե որոշեմ թեստ հանձնել, կանեմ առանց որևէ մեկի հրահանգի․ Կարեն Սարուխանյան
ԵՄ-ն Կիևին 500 միլիոն եվրո կհատկացնի ծանր սպառազինության համար
Քաղաքականություն
13.05.2022 | 13:31
Եվրամիությունը լրացուցիչ 500 մլն եվրո օգնություն կհատկացնի Ուկրաինային ծանր սպառազինություն՝ տանկեր և հրետանի գնելու համար։ Այս մասին հայտարարել է ԵՄ արտաքին քաղաքականության ղեկավար Ժոզեպ Բորելը Մեծ յոթնյակի (G7) ԱԳ նախարարների հանդիպմանը ժամանելուն պես, գրում է Korrespondent-ը։
«Սա G7-ի արտգործնախարարների յոթերորդ հանդիպումն է ուկրաինական ճգնաժամի սկզբից ի վեր: Բաղադրատոմսը մնում է նույնը՝ ավելի շատ աջակցություն Ուկրաինային, ներառյալ՝ ռազմական աջակցությունը: Ես կհայտարարեմ Ուկրաինային 500 միլիոն եվրոյի ռազմական օգնություն հատկացնելու մասին, որը մեր օգնությունը, ընդհանուր առմամբ, կհասցնի 2 միլիարդ եվրոյի»,- ասել է Բորելը։
Նա մանրամասնել է, որ այդ միջոցներն «օգտագործվելու են ծանր սպառազինություն ձեռք բերելու համար, այս պահին արդեն ուղարկվել է զրահատեխնիկա, տանկեր, հրետանի և արկեր»։
Պատասխանելով հարցին՝ արդյո՞ք ԵՄ երկրները կարող են ֆինանսավորել Ուկրաինային ռազմական ինքնաթիռների մատակարարումը, Բորելն ասել է. «Ոչ, 500 միլիոն եվրոյով հնարավոր չէ գնել շատ ինքնաթիռներ, այդ միջոցները կուղղվեն այս տեսակի պատերազմի համար անհրաժեշտ ծանր սպառազինություն ձեռք բերելուն»։
Բորելը նաև կոչ է արել G7-ի երկրներին ուժեղացնել ճնշումը Ռուսաստանի վրա, կիրառել նոր պատժամիջոցներ, փորձել մեկուսացնել Ռուսաստանի Դաշնությունը համաշխարհային ասպարեզում և «միասնական ճակատ ստեղծել Ուկրաինային աջակցելու համար»։
Հիշեցնենք, որ ապրիլին ԵՄ-ն նաև 500 մլն եվրո է հատկացրել Ուկրաինային զենք գնելու համար։ Դրանք արդեն պետք է ընդունված լինեն Կիևի կողմից։
Տաթև Ֆռանգյան
