Թուրքիան պատասխանել է Իրանի ԱԳ նախարարի մեղադրանքներին

Թուրքիան արձագանքել է իրանական կողմի այն մեղադրանքներին, որ սահմանային ջրերի վրա ամբարտակների կառուցումը խնդիրներ է առացանում, և Թեհրանը դեմ է դրան։ Թուրքիայի ԱԳՆ մամուլի քարտուղար Թանջու Բիլգիչը հայտարարել է, որ իրանական կողմի պնդումները, թե «ջրամբարների կառուցման և տարածաշրջանում ավազի ու փոշու փոթորիկների առաջացման փոխհարաբերություններ կան, հեռու են գիտական ​​հիմնավորումից», գրում է «Անադոլու» գործակալությունը։

Նրա խոսքով՝ ավազային փոթորիկները բացասաբար են անդրադառնում թե՛ Թուրքիայի, թե՛ Իրանի վրա, և այդ բնական երևույթների առաջացման հիմնական գոտիներն Աֆրիկայի և Մերձավոր Արևելքի երկրներն են։

Թուրք դիվանագետը ուշադրություն է հրավիրել լրատվամիջոցներում ու Իրանի քաղաքական գործիչների շրջանում երկրում էկոլոգիական իրավիճակի վատթարացման հետ կապված թուրքական հետքի քննարկումների ուղղությամբ։ 

«Թուրքիան անդրսահմանային ջրային ռեսուրսները համարում է համագործակցության գործոն, ոչ թե հակասությունների։ Մեր երկիրը շարունակելու է հաշվի առնել հարևան պետությունների շահերը և գործել միջազգային իրավունքի շրջանակներում»,- ասել է Բիլգիչը։

Հիշեցնենք՝ Իրանի ԱԳ նախարար Հոսեյն Ամիր Աբդոլլահիանը հայտարարել էր, որ Թուրքիայի կողմից ամբարտակների կառուցումը սահմանային ջրերի վրա անընդունելի է։ Նա հայտնել էր, որ հարցը բարձրացվել է վերջին ամիսներին առնվազն երեք անգամ՝ Նյու Յորքում և Թեհրանում երկու դեմ առ դեմ հանդիպումների և Թուրքիայի արտգործնախարարի հետ հեռախոսազրույցի ընթացքում։ 

Արաքս գետի վրա Թուրքիայի կողմից ամբարտակի կառուցումը հատուկ վտանգ է ներկայացնում Իրանում ջրի հասանելիության համար:

Էմմա Չոբանյան