Պուտինի և ՌԴ ղեկավարության հայտարարությունները հաշվի կառնվեն ուկրաինացիների ցեղասպանության հարցը քննարկելիս․ Amnesty International

Ռուսաստանի ղեկավարությունը՝ նախագահ Վլադիմիր Պուտինի գլխավորությամբ, ատելություն է զգում բոլոր ուկրաինացիների նկատմամբ։ Այս մասին ասել է Amnesty International (AI) իրավապաշտպան կազմակերպության գլխավոր քարտուղար Ագնես Կալամարը, գրում է DW-ի ռուսական ծառայությունը։

«Կան Պուտինի և Ռուսաստանի այլ ղեկավարների հայտարարություններ, մեկնաբանություններ և ելույթներ, որոնք ցույց են տալիս, թե ինչպես են նրանք անտեսում և ատում ուկրաինացի ժողովրդին, որտեղ նրանք խոսում են այնպես, ասես Ուկրաինան գոյություն չունի»,- ուկրաինական հեռուստատեսությանը տված հարցազրույցում ասել է Կալամարը:

Նրա խոսքով՝ այդ հայտարարությունները հաշվի կառնվեն «ուկրաինացիների ցեղասպանության հարցը քննարկելիս»։ Այս պատերազմում կիրառված բռնությունը հիմնված է Ռուսաստանի ղեկավարության կողմից ստեղծված մտածելակերպի վրա, ասում է AI գլխավոր քարտուղարը։

«Բռնությունը դառնում է գործելաոճ, նրանք փակում են աչքերը դրա վրա, երբեմն նույնիսկ փառաբանում են այն: Չկա վերահսկողություն, և դա պայմաններ է ստեղծում բռնի վարքագծի համար, սա անպատժելիության ռեժիմ է»,- ասել է Կալամարը:

Իրավապաշտպան կազմակերպության գլխավոր քարտուղարը խոստովանել է, որ չկա որևէ ապացույց, որ ռուսական զորքերի հրամանատարությունը զինվորներից պահանջել է խոշտանգումներ կիրառել և սպանել․ «Սակայն մենք ապացույցներ ունենք, որ ղեկավարությունը չի դադարեցնում այդ հանցագործությունները, ուստի դրանք նորից ու նորից կրկնվում են»։

Ըստ Ագնես Կալամարի՝ այս պատերազմում AI-ի խնդիրն է աշխարհին տեղեկացնել Ուկրաինայում ռուսական զորքերի կատարած հանցագործությունների մասշտաբների և տեսակների մասին։

«Մենք ցանկանում ենք ցույց տալ, որ այս պատերազմը միայն Ուկրաինայի, Եվրոպայի և ՆԱՏՕ-ի խնդիրը չէ, ռուսական ագրեսիան խնդիր է ողջ աշխարհի համար»,- ընդգծել է Amnesty International-ի գլխավոր քարտուղարը։

Վերջերս Կալամարը պատվիրակության կազմում մեկնել է Կիևի արվարձաններ, որտեղ տասնյակ խաղաղ բնակիչներ դարձել են ռուսական ենթադրյալ ռազմական հանցագործությունների զոհ:

Տաթև Ֆռանգյան