27.02.2026 | 23:31
Ստեփանծմինդա-Լարս ավտոճանապարհը փակ է
Անկարան խորացնում է ռազմական համագործակցությունը ՀԱՊԿ անդամների հետ․ հանդիպել են Թուրքիայի և Ղազախստանի ՊՆ ղեկավարները
Քաղաքականություն
10.05.2022 | 18:23
Թուրքիան շարունակում է զարգացնել և խորացնել ռազմական համագործակցությունը ՀԱՊԿ անդամ պետությունների հետ։ Ղրղզստանի և Տաջիկստանի ղեկավարներից հետո հիմա էլ Թուրքիա է ժամանել Ղազախստանի պաշտպանության նախարար Ռուսլան Ժակսիլիկովը, որին այսօր ընդունել է Թուրքիայի ՊՆ ղեկավար Հուլուսի Աքարը։
«Անադոլու» գործակալության հաղորդմամբ՝ Աքարն ու Ժակսիլիկովը քննարկել են «երկու եղբայրական պետությունների միջև պաշտպանական համագործակցության խորացման ուղիները, ինչպես նաև տարածաշրջանային անվտանգության հարցեր»։
Աքարն ընդգծել է Թուրքիայի և Ղազախստանի ժողովուրդներին կապող պատմական կապերի առկայությունը։ Նա երկու երկրների միջև ռազմավարական գործընկերության համաձայնագիրը կարևոր հանգրվան է անվանել կապերի ընդլայնման համար։ Աքարը նաև ընդգծել է թուրք-ղազախական պաշտպանական կապերի ընդլայնման կարևորությունը, այդ թվում՝ համատեղ զորավարժությունների և պաշտպանական արդյունաբերության ոլորտում։
Հավելենք, որ այսօր առաջին անգամ երկօրյա պաշտոնական այցով Թուրքիա է ժամանել Ղազախստանի նախագահ Կասիմ-Ժոմարտ Տոկաևը։
Դեռ նախորդ ամիս Թուրքիա էր այցելել ՀԱՊԿ մեկ այլ անդամ Տաջիկստանի պաշտպանության նախարարը։ Անկարայում Թուրքիայի և Տաջիկստանի ՊՆ ղեկավարները ստորագրել են պաշտպանական համագործակցության շրջանակային համաձայնագիր։ Բացի այդ, Թուրքիան «Բայրաքթար» անօդաչուներ է մատակարարում Ղազախստանին, Տաջիկստանին և Ղրղզստանին։
Հավելենք, որ Հայաստանի հետ միասին ՀԱՊԿ անդամ երկրներն են՝ ՌԴ-ն, Բելառուսը, Ղազախստանը, Ղրղզստանն ու Տաջիկստանը։
Էմմա Չոբանյան
