23.04.2026 | 12:02
Սամվել Կարապետյանը հանդիպում է անցկացրել կուսակցականների հետ․ ՏԵՍԱՆՅՈՒԹ
Ուկրաինան լրացրել է ԵՄ անդամության թեկնածուի կարգավիճակ ստանալու համար հարցաշարի երկրորդ մասը
Քաղաքականություն
09.05.2022 | 18:21
Ավարտվել է Ուկրաինայի՝ Եվրամիության անդամության թեկնածուի կարգավիճակ ստանալու համար հարցաշարի երկրորդ մասի աշխատանքը։ Այս մասին հայտնում է Ուկրաինայի նախագահի մամուլի ծառայությունից, փոխանցում է ՈւՆԻԱՆ-ը։
Նշվում է, որ Վլադիմիր Զելենսկին տեսակապի միջոցով զրուցել է Եվրահանձնաժողովի նախագահ Ուրսուլա ֆոն դեր Լյայենի հետ։
«Ես ցույց տվեցի լրացված հարցաթերթիկի երկրորդ մասը, որպեսզի Ուկրաինան ստանա Եվրամիության անդամության թեկնածուի կարգավիճակ»,- ասել է Զելենսկին։
Նա շնորհակալություն է հայտնել Եվրահանձնաժողովի ղեկավարին այս կարևոր ճանապարհին Ուկրաինային «աջակցության հստակ ազդանշանների համար»։
Փետրվարի 28-ին Վլադիմիր Զելենսկին ստորագրել է Եվրամիությանը Ուկրաինայի անդամակցության դիմումը։ Ապրիլի 8-ին Եվրահանձնաժողովի նախագահ ֆոն դեր Լյայենը Կիև կատարած այցի ժամանակ Ուկրաինայի նախագահին է հանձնել հարցաթերթիկը, որի լրացումն անհրաժեշտ քայլ է՝ Ուկրաինային ԵՄ անդամության թեկնածուի կարգավիճակ տալու համար։
Ապրիլի 15-ին հայտնի դարձավ, որ հարցաշարի առաջին մասի աշխատանքներն ավարտվել են։
Տաթև Ֆռանգյան
