22.04.2026 | 23:30
ՀՀ տարածքում ավտոճանապարհները հիմնականում անցանելի են
Ուկրաինայում պատերազմն ավելի քան 3200 մարդու կյանք է խլել, այդ թվում՝ 230 երեխայի․ ՄԱԿ
Քաղաքականություն
06.05.2022 | 21:43
ՄԱԿ-ը հրապարակել է զեկույց, որում թարմացված տեղեկություններ են ներկայացվում Ուկրաինայում ռազմական գործողությունների ժամանակ զոհվածների և վիրավորների մասին։
Կազմակերպության տվյալներով՝ Ուկրաինա ռուսական ներխուժման սկզբից ի վեր սպանվել է առնվազն 3․280 խաղաղ բնակիչ, վիրավորվել՝ 3451-ը։ Նրանցից 231-ը երեխաներ են (մինչև 18 տարեկան), միաժամանակ, մահացած երեխաներից 73-ին գտել են այնպիսի վիճակում, որ նրանց սեռը հնարավոր չէ որոշել։
«Քաղաքացիների շրջանում զոհերի կամ վիրավորների մեծամասնությունը պայթուցիկ սարքերի կիրառման հետևանք է՝ ազդեցության լայն տիրույթով, ներառյալ ծանր հրետանուց և բազմակի հրթիռային համակարգերից հրթիռակոծումը, ինչպես նաև օդային հարվածները»,- ասվում է զեկույցում:
ՄԱԿ-ի զեկույցը նաև տվյալներ է հրապարակել ինքնահռչակ Դոնեցկի և Լուգանսկի հանրապետություններում սպանվածների մասին։ Այնտեղ մահացել է 105 մարդ, վիրավորվել՝ 417-ը։
ՄԱԿ-ի փորձագետների տեղեկացմամբ՝ զոհերի իրական թիվը շատ ավելին է, քանի որ շատ տվյալներ դեռ պահանջում են լրացուցիչ հաստատում, մինչդեռ որոշ վայրերից, որտեղ մարտերը շարունակվում են, տեղեկություններ ստանալն անհնար է:
Կազմակերպությունում նշում են, որ դեռևս անհրաժեշտ է տեղեկատվություն հավաքել Մարիուպոլում, Իզյումում և Պոպասնայում զոհվածների և վիրավորների մասին, որտեղ, ըստ տեղեկությունների, խաղաղ բնակիչների մահվան կամ վիրավորվելու բազմաթիվ դեպքեր են գրանցվել։
Տաթև Ֆռանգյան
