Խոշորացված համայնքում ղեկավար չընտրվելու դեպքում վարչապետը կկարողանա պաշտոնակատար նշանակել․ նախագիծ. ՏԵՍԱՆՅՈՒԹ

Ազգային ժողովը արտահերթ նիստում առաջին ընթերցմամբ քննարկվում է «Քաղաքացիական պայմանագիր» խմբակցության պատգամավորներ Վահե Ղալումյանի և Վահագն Հովակիմյանի հեղինակած ««Տեղական ինքնակառավարման մասին» օրենքում լրացում կատարելու մասին» օրենքի նախագիծը:

Խորհրդարանում ներկայացնելով նախագիծը՝ Վահագն Հովակիմյանը պարզաբանեց, որ 102-րդ հոդվածի 6-րդ մասը նախատեսում է ֆորս-մաժորային իրավիճակ, երբ խոշորացված համայնքներում ինչ-ինչ պատճառներով համայնքի ղեկավար չի ընտրվում, ապա այս դեպքում հնարավորություն է ընձեռվում, որ վարչապետը կարողանա համայնքի ղեկավարի ժամանակավոր պաշտոնակատար նշանակել` մինչև համայնքը կընտրի իր ղեկավարին:

Նախագծի ընդունմամբ «Տեղական ինքնակառավարման մասին» օրենքի 102-րդ հոդվածի 6-րդ մասով սահմանված դեպքերում համայնքի ղեկավարի պաշտոնակատար կարող է նշանակվել նաև տվյալ համայնքի ավագանու անդամը:

Նույն օրենքի 27-րդ հոդվածով համայնքի ղեկավարի պաշտոնակատարների համար սահմանված է մեկ չափանիշ, որ պաշտոնակատարը պետք է լինի ՀՀ քաղաքացի: Սակայն նույն օրենքի 19-րդ հոդվածը, ըստ պատգամավորի, վերաբերում է մեծամասնական ընտրակարգին:

«Մեծամասնական ընտրակարգի դեպքով պայմանավորված՝ սահմանափակում կա, որ ավագանու անդամը չի կարող լինել համայնքի ղեկավարի պաշտոնակատար: Այս դեպքում հաշվի առնելով, որ խոշորացված համայնքները համամասնական ընտրակարգով ձևավորված համայնքներ են, և, որպեսզի տարընթերցումը, օրենքի դրույթների հակասությունը վերանան, առաջարկվում է 102-րդ հոդվածի 6-րդ մասում ավելացնել ամրագրում, որ 19-րդ հոդվածի կարգավորումն այս դեպքում չի գործում: Սրանով մենք հնարավորություն ենք տալիս ՀՀ վարչապետին՝ իր քաղաքական կամքն իրացնելիս անկաշկանդ լինել»,- պարզաբանեց Հովակիմյանը:

Նախագիծն առաջին ընթերցմամբ ընդունվեց՝ ստանալով 66 կողմ ձայն: Երկրորդ ընթերցմամբ քննարկումը տեղի կունենա մայիսի 6-ին:

Մանրամասները՝ տեսանյութում: