Նավթային էմբարգո, պատրիարք Կիրիլ, Ալինա Կաբաևա․ ԵՄ-ն ոչ մի կերպ չի կարողանում համաձայնության գալ ՌԴ-ի դեմ նոր պատժամիջոցների հարցով

Եվրամիությունը չորեքշաբթի հայտարարել է Ռուսաստանի դեմ նավթային էմբարգոյի մասին, և արդեն երրորդ օրն է՝ ԵՄ անդամ 27 երկրներ փորձում են համաձայնության գալ պատժամիջոցների վեցերորդ փաթեթի շուրջ, որը, ի թիվս այլոց, կարող է ներառել պատրիարք Կիրիլին և նախկին մարմնամարզուհի Ալինա Կաբաևային, գրում է BBC-ի ռուսական ծառայությունը:

Դեռ ամեն ինչ հարթ չէ, կան անհամաձայններ։ Ըստ արևմտյան մամուլի՝ Հունաստանը և Հունգարիան դեմ են եղել պատրիարք Կիրիլի ընդգրկմանը պատժամիջոցների ցուցակում, Հունգարիան, Սլովակիան և Չեխիան համաձայն չեն նավթային էմբարգոյի պայմաններին, իսկ Հունաստանն ու Կիպրոսը դեմ են ռուսական նավթը եվրոպական տանկերներով փոխադրումների արգելքին։

Եվրահանձնաժողովն առաջարկել է վեց ամսում հրաժարվել ռուսական նավթից, իսկ նավթամթերքից՝ մինչև տարեվերջ։ Հունգարիային և Սլովակիային հավելյալ տարի են խոստացել, սակայն Հունգարիայի վարչապետ Վիկտոր Օրբանը նախ դժգոհություններով նամակ է ուղարկել Բրյուսել, իսկ ուրբաթ ռադիոյով հայտարարել է, որ Հունգարիայի համար մեկուկես տարին քիչ է, անհրաժեշտ է հինգ տարի, և ինքը սպասում է բարելավված առաջարկների Բրյուսելից, հայտնում է Reuters-ը։

Եթե այս սակարկություններն այսօր ավարտվեն, ապա ԵՄ-ն կարող է ժամանակ ունենալ մինչև աշխատանքային շաբաթվա ավարտը հաստատել պատժամիջոցների վեցերորդ փաթեթը, իսկ հետո հայտնի կդառնա, թե կոնկրետ ովքեր են հայտնվել ցուցակներում և ինչ սահմանափակումներ են մտցվելու։

Նշվում է, որ սկզբում պատժամիջոցների ցուցակի նախագծում ներառված էր 58 անուն, այդ թվում՝ պատրիարք Կիրիլի, Կրեմլի խոսնակ Դմիտրի Պեսկովի ընտանիքի անդամների և Բուչայում խաղաղ բնակիչների սպանության համար պատասխանատու ռուս զինվորականների: Սակայն հետո դրան ավելացվել է ևս 4 անուն՝ ՌԻԱ պետական գործակալության երեք աշխատակիցներ՝ իրենց հեղինակային սյունակներում ատելություն սերմանելու համար, ինչպես նաև Ալինա Կաբաևան, նախօրեին գրել են Agence France Presse-ը և Bloomberg-ը։

ԵՄ-ն և ԱՄՆ-ն արդեն պատժամիջոցներ են սահմանել Վլադիմիր Պուտինի երկու դուստրերի նկատմամբ։ Ամերիկյան մամուլը գրել է, որ Կաբաևային հանել են ցուցակից՝ Պուտինին չբարկացնելու համար։ Եվրահանձնաժողովն առաջարկում է պատժամիջոցներ կիրառել Կաբաևայի դեմ Պուտինի հետ սերտ կապերի և այն բանի համար, որ նա 2014 թվականից գլխավորում է թերթերն ու հեռուստաալիքները միավորող National Media Group-ի տնօրենների խորհուրդը, գրում է France Presse-ը՝ վկայակոչելով փաստաթղթի նախագիծը։

Այս լուրն ուրախացրել է ռուս ընդդիմադիր Ալեքսեյ Նավալնիի գործընկերներին, որոնք վերջին մեկ ամսվա ընթացքում պահանջում էին պատժամիջոցներ կիրառել Կաբաևայի դեմ։