17.01.2026 | 20:00
ՔՆՆԱՐԿՈՒՄ․ ՀՀ-ն ինչպե՞ս է կատարել ԵՄ-ի հետ CEPA համաձայնագիրը․ մշտադիտարկման արդյունքներ
Ադրբեջանցի պատգամավորներն ԱՄՆ-ին մեղադրել են Բաքվի նկատմամբ երկակի ստանդարտ կիրառելու համար
Քաղաքականություն
05.05.2022 | 14:49
Ադրբեջանի Միլի Մեջլիսի պատգամավորներն այսօրվա նիստում քննադատել են ԱՄՆ Պետքարտուղարությունը։ Ադրբեջանական լրատվամիջոցների փոխանցմամբ՝ պատգամավորներից Ազայ Գուլիևը հայտարարել է, որ Ադրբեջանում մարդու իրավունքների և լրատվամիջոցների ազատության վիճակի մասին Պետքարտուղարության զեկույցները չեն համապատասխանում իրականությանը։
«Ինչպե՞ս է հնարավոր, որ աֆրիկյան մի շարք երկրների ցուցանիշները վարկանիշներում մեզանից ավելի լավ լինեն»,- բողոքել է պատգամավորը։
Մեկ այլ պատգամավոր՝ Սիյավուշ Նովրուզովն էլ ասել է, որ ինքը՝ ԱՄՆ-ն, մնացել է նույն դիրքում, ինչ 10 տարի առաջ։
«Մի շարք եվրոպական երկրներում ոստիկանությունը բռնություն է կիրառում միգրանտների նկատմամբ։ Երբեմն մենք տեսնում ենք շրջված նավակների և խեղդվող միգրանտների կադրեր։ Սակայն ԱՄՆ Պետքարտուղարությունը նման դեպքերին չի արձագանքում»,- ասել է Նովրուզովը։
Պատգամավոր Սահիբ Ալիևն էլ դժգոհել է, որ Միացյալ Նահանգները, իբր, Ադրբեջանի նկատմամբ երկակի ստանդարտներ է կիրառում ու մեղադրանքներ հնչեցրել։
«Մերձավոր Արևելքում իր վարած քաղաքականության արդյունքում նա պայմաններ է ստեղծում մարդկանց թրաֆիքինգի ընդլայնման համար։ Հիմա էլ պատերազմն Ուկրաինայում։ Դեռ այս իրադարձություններից առաջ նրանք դա օգտագործում էին մարդկանց առևտրի ոլորտում տարանցման համար»,- ասել է ադրբեջանցի պատգամավորը։
Էմմա Չոբանյան
